ANKARA (AA) - Presidenti i Turqisë, Recep Tayyip Erdoğan, priti me ceremoni zyrtare homologun e tij nga Serbia, Aleksandar Vuçiç, i cili ndodhet për vizitë zyrtare në Turqi, raporton Anadolu Agency (AA).
Erdoğan priti presidentin serb Vuçiç në hyrje të Kompleksit Presidencial në Ankara, ndërsa ceremonia vijoi me intonimin e himneve të të dy vendeve.
Vuçiç përshëndeti gardën e nderit kurse pas prezantimit të delegacioneve, dy presidentët pozuan para flamurit të Turqisë dhe Serbisë.
Erdoğan dhe Vuçiç, të cilët kaluan në takimin kokë më kokë, më pas do të marrin pjesë në Seancën e Këshillit të Lartë të Bashkëpunimit.
Pas ceremonisë së firmosjes së marrëveshjeve, dy presidentët pritet të mbajnë një konferencë të përbashkët për shtyp, ndërsa do të vijojë edhe një darkë zyrtare e shtruar nga Erdoğan në nder të homologut serb.
Në ceremoninë e pritjes morën pjesë edhe zyrtarë të lartë shtetërorë të Turqisë, përfshirë zëvendëskryeministrin Fikri Işık, ministra të shumtë, si ministri i Jashtëm Mevlüt Çavuşoğlu si dhe zëdhënësin presidencial Ibrahim Kalın.
