Martirizohen 5 ushtarë turq në sulmin e regjimit në Siri

Ministria e Mbrojtjes tha se forcat turke, të cilat “u dërguan si përforcim për të parandaluar konfliktet në Idlib, për të garantuar sigurinë kufitare dhe për të parandaluar migrimin dhe tragjedinë humanitare, ishin pre e zjarrit intensiv të artilerisë nga forcat e regjimit”.

Më tej, ministria turke tha se objektivat e armikut u shkatërruan menjëherë, duke shtuar se autoritetet po monitorojnë situatën në rajonin e paqëndrueshëm.

Në një sulm të ngjashëm javën e kaluar nga forcat e regjimit sirian në Idlib u martirizuan 7 ushtarë turq dhe 1 kontraktues civil që punonte me ushtrinë turke. Në sulmin e javës së kaluar po ashtu u plagosën mbi 10 persona.

Trupat turke janë në veriperëndim të Sirisë, përtej kufirit turk, në kuadër të një misioni të paqes dhe kundër-terrorizmit.

Idlibi ka qenë bastioni i opozitës dhe grupeve të armatosura anti-qeveritare që nga shpërthimi i luftës civile siriane në vitin 2011.

Në shtator të vitit 2018, Turqia dhe Rusia u pajtuan ta kthejnë Idlibin në një zonë de-eskalimi ku aktet e agresionit janë të ndaluara.

Por, që nga ajo kohë më shumë se 1.800 civilë janë vrarë atje në sulmet nga regjimi dhe forcat ruse, duke shkelur armëpushimin e vitit 2018 dhe një të ri të 12 janarit të këtij viti.

Gjatë vitit të kaluar, mbi 1.5 milionë sirianë janë zhvendosur në drejtim të kufirit turk për shkak të sulmeve të mëdha.

Turqia mbetet vendi që strehon më shumë refugjatë në botë, me mbi 3.7 milionë migrantë të strehuar që nga fillimi i luftës civile siriane.