Kompania ajrore Turkish Airlines mbetet marka më e vlefshme e vendit

Kompania ajrore turke Turkish Airlines ruajti pozicionin e saj kryesor si marka më e vlefshme e vendit në vitin 2025, tregoi një raport i kohëve të fundit nga grupi i vlerësimit Brand Finance, transmeton Anadolu.

Vlera e markës së Turkish Airlines arriti në 2.2 miliardë dollarë këtë vit, sipas raportit vjetor Brand Finance të Turqisë 2025. Brand Finance ka publikuar raporte vjetore mbi vlerat e markave që nga viti 2007, duke zgjeruar listën e saj nga 100 në 125 pas një rritjeje në numrin e markave.

Pas Turkish Airlines, prodhuesi turk i pajisjeve shtëpiake Arcelik u rendit i dyti me një vlerë marke prej 1.64 miliardë dollarësh. Banka turke IS Bank u ngjit nga vendi i katërt në të tretin këtë vit, pasi vlera e markës së saj arriti në 1.24 miliardë dollarë.

Prodhuesi i elektronikës Vestel nga vendi i tretë vitin e kaluar ra në të katërtin këtë vit ndërsa vlera e markës së saj arriti në 928 milionë dollarë.

Prodhuesi i automjeteve Ford Otosan u rendit i pesti me një vlerë prej 905 milionë dollarësh, i ndjekur nga Ziraat Bank me 875 milionë dollarë, shitësi me pakicë i modës LC Waikiki me 828 milionë dollarë, kompania e shërbimeve financiare Garanti BBVA me 721 milionë dollarë, marka turke e pijeve Yeni Raki me 590 milionë dollarë dhe VakifBank me 386 milionë dollarë.

Marka e parë e automjeteve elektrike në Turqi, Togg, hyri në listë vitin e kaluar në vendin e 20-të dhe e mbajti atë pozicion në vitin 2025 me një vlerë marke prej 179 milionë dollarësh.

Rreth 24 marka të reja u renditën këtë vit, përkatësisht Altinkilic, Astor Energy, Bilkom, Bizim, Celik Motor, Dogan Trend, Efor Cay, Eker, Eksun, Gezinomi, Hedef Filo, Hepsiburada, Mobiltel, Oba Makarna, Penta, Reeder, Sasa, Suwen, TV8, Trendyol, VBT Yazilim, VDF Filo dhe Yigit Aku.

- Vlera totale arrin në 17 miliardë dollarë

Drejtor menaxhues i Brand Finance të Turqisë, Muhterem Ilguner për Anadolu tha se vlera totale e 125 markave kryesore u rrit me 15.6 për qind nga viti në vit, duke arritur në 17 miliardë dollarë.

"Suksesi jashtë vendit i disa shitësve me pakicë të modës së gatshme për veshje si LC Waikiki, Mavi dhe Koton është në rritje, duke reflektuar rëndësinë e krijimit të markës në këtë sektor", tha ai.

"Rreth 20 marka të reja u shtuan në listë këtë vit", tha Ilguner duke shtuar se kompanitë e lëvizshmërisë dhe softuerëve kanë fituar rëndësi.