IHH hap mbi 6.700 puse uji në nivel global

STAMBOLL (AA) – Fondacioni Humanitar Turk (IHH) deri më tani ka hapur 6.747 puse uji në 36 vende, në kuadër të projektit të saj 18-vjeçar, transmeton Anadolu Agency (AA).

Në një deklaratë të lëshuar në shënimin e Ditës Botërore të Ujit, IHH tha se është duke vazhduar përpjekjet e saj për të siguruar që miliona njerëz, të cilët vuajnë nga mungesa e ujit në të gjithë botën të kenë qasje në ujë të pastër që plotëson të gjitha nevojat e tyre.

Projekti, i cili u inicua në vitin 2000, vazhdon deri në ditët e sotme nëpër kontinentet e Afrikës, Azisë dhe Lindjes së Mesme, ku 3 milionë e 373 mijë njerëz i plotësojnë nevojat e tyre të ujit përmes puseve të tilla të ujit.

Sipas një raporti të Kombeve të Bashkuara (OKB), të përgatitur së bashku me UNICEF-in në vitin 2017, 2.1 miliardë njerëzve iu pamundësua qasja në ujin e pastër. Në raport theksohet se ujë të pastër nuk ka në shtëpitë e çdo tre njerëzve nga 10 në botë.

Në raport poashtu thuhet se për çdo vit 502 mijë njerëz humbin jetën e tyre për shkak të sëmundjes diarreike të shkaktuar nga përdorimi i ujit të ndotur dhe kanalizimeve të pamjaftueshme, ndërsa 4.5 miliardë njerëz nuk kanë shërbime sanitare dhe higjienike.

Me puset e ujit të krijuara nga IHH, vendasit jo vetëm që kanë qasje në ujë të pastër dhe të pijshëm, por gjithashtu janë në gjendje të përdorin ujin për aktivitetet e tyre bujqësore dhe të gjenerojnë të ardhura.

Puset e ujit, të cilat janë një faktor i rëndësishëm në parandalimin e ushqimit dhe mungesës së ujit, poashtu krijojnë një urë midis zemrave të vendasve dhe donatorëve të puseve.

Puset e ujit janë emëruar sipas donatorëve. Në të vërtetë, pjesa më e madhe e puseve janë emëruar sipas martirëve të 15 korrikut të vitit 2016, tentativës për grusht shteti më 15 korrik të vitit 2016 në Turqi dhe operacionit “Dega e Ullirit”.

Ndër vendet ku IHH ka vendosur puset e ujit janë Etiopia, Somalia, Nigeria, Sudani, Kameruni, Kenia, India, Bangladeshi, Afganistani, Sri Lanka, Palestina, Iraku dhe Libani.