Presidenti Thaçi takon liderët e partive shqiptare të Maqedonisë

PRISHTINË (AA)- Presidenti i Republikës së Kosovës, Hashim Thaçi, sot në Prishtinë ka takuar liderët e partive politike shqiptare të Maqedonisë, transmeton Anadolu Agency (AA).

Në një njoftim nga Presidenca e Kosovës bëhet e ditur se në takimet e presidentit Thaçi me kryetarin e BDI-së, Ali Ahmeti, me kryetarin e Lëvizjes BESA, Bilal Kasami dhe të Aleancës për Shqiptarët, Ziadin Sela, është diskutuar nevoja për një koordinim të mirëfilltë të faktorit politik shqiptar që ka për qëllim respektimin e vullnetit të lirë dhe demokratik të votuesve shqiptarë të shprehur në zgjedhjet e parakohshme parlamentare në Republikën e Maqedonisë, më 11 dhjetor 2016.

“Presidenti Thaçi i ka përgëzuar për sjelljen e partive politike shqiptare para dhe pas rezultatit zgjedhor, i cili duhet të reflektoj momentin për të riafirmuar përcaktimet programore dhe strategjike të shqiptarëve që janë edhe në interes të së ardhmes evropiane të Maqedonisë. Në takim me përfaqësuesit e partive politike parlamentare në Maqedoni është shprehur gatishmëria e tyre për t’u angazhuar maksimalisht në përfaqësimin sa më të mirë të interesave të shqiptarëve dhe të prosperitetit e stabilitetit afatgjatë të Maqedonisë”, thuhet në njoftimin e Presidencës.