BE planifikon të prezantojë certifikatat e vaksinimit

Komisioni Evropian (KE) prezantoi propozimin e tij për lëshimin e certifikatave të vaksinimit që do të përdoren për udhëtime brenda bllokut, transmeton Anadolu Agency (AA).

Dokumenti i BE-së, i quajtur zyrtarisht Certifikata e Gjelbër Digjitale, ka për qëllim të lehtësojë udhëtimin brenda bllokut gjatë pandemisë së koronavirustit të ri (COVID-19) duke hequr dorë nga karantina ose kërkesat e testit për ata që mbajnë leje.

Dokumenti do të provojë nëse dikush është vaksinuar kundër COVID-19, ka një rezultat negativ të testit të PCR-së ose është shëruar nga sëmundja.

Komisioni Evropian do të krijojë një sistem të përbashkët të certifikatave COVID-19 që mbledh të dhënat nga regjistrat kombëtar të shëndetit, i cili pritet të funksionojë që në qershor.

Shtetet anëtare të BE-së do të jenë të lira të vendosin se çfarë kërkojnë nga njerëzit që mbajnë certifikatën, por ato nuk duhet të bëjnë dallime midis atyre që mbajnë lejen.

Për shembull, nëse një vend heq kërkesat për karantinë për mbajtësit e lejes së gjelbër, ai nuk duhet të bëjë dallimin midis atyre që janë vaksinuar ose kanë një test PCR, as midis kombeve të ndryshme.

Vendet mund të trajtojnë ndryshe vetëm ata që janë vaksinuar nga vaksinat jo të aprovuara nga Agjencia Evropiane e Mjekësisë, siç janë produktet kineze ose ruse.

Qytetarët e BE-së dhe anëtarët e familjes së tyre, si dhe shtetasit e vendeve jo anëtare të BE-së që banojnë në bllok mund të marrin lejen.

Mbylljet e kufijve dhe kufizime të ndryshme të udhëtimit provokuan mosmarrëveshje midis vendeve anëtare të BE-së dhe u kritikuan nga organi ekzekutiv i BE-së.

Nuk është e qartë në këtë moment nëse vendet e BE-së do të miratojnë propozimin sepse shumë udhëheqës shprehën kritika mbi idenë e cila mund të përfundojë në diskriminim.

Sidoqoftë, vendet që mbështeten shumë te turizmi pritet të bëjnë përpjekje të mëdha për miratimin e sistemit me një shpresë për të shpëtuar sezonin e verës.