Kroaci, në Vukovar shënohet Dita e Përkujtimit

VUKOVAR (AA) - Shënimi i përvjetorit të 24-të të rënies së Vukovarit gjatë Luftës së fundit filloi këtë mëngjes, duke mbledhur udhëheqësit shtetërorë, të kryesuar nga presidentja kroate, Kolinda Grabar-Kitaroviç, dhe qytetarët nga i gjithë vendi përpara spitalit të Vukovarit, raporton Anadolu Agency (AA).

Qytetarët nga të gjitha anët e vendit, por edhe nga jashtë tij kanë udhëtuar sot drejt Vukovarit me makina, autobusë, trena, dhe transport të organizuar. Vizitorët mbajnë flamurin kroat, kurse pjesëtarët e Gardës kanë veshur uniformat ushtarake nga lufta.

Presidentja e Kroacisë, Kolinda Grabar-Kitaroviç, kryeministri, Zoran Milanoviç me anëtarët e Qeverisë dhe kryetarin e Parlamentit, Josip Leko, si dhe deputetët do të nderojnë viktimat e Vukovarit, duke vendosur kurora në përmendoren e varrezave Memoriale.

Në mbrëmje, përgjatë lumit Danub do të lëshohen me qindra qirinj të ndezur që simbolizojnë mbrojtësit e vrarë dhe të zhdukur të Vukovarit.

Presidentja kroate do të vendosë kurora edhe në memorialin e varrit masiv në Ovçari.

Në përkujtim të rënies së Vukovarit në vitin 1991, mbrëmë në të gjithë Kroacinë janë ndezur qirinj.

Beteja për mbrojtjen e Vukovarit, e cila zgjati gati tre muaj, la të vrarë rreth 2,900 deri 3,600 vetë. Vetëm sipas të dhënave të spitalit të Vukovarit, në betejën u vranë 1,624 civilë dhe pjesëtarë të ushtrisë kroate, u plagosën 1,219 njerëz.

Rrethimi zgjati gati tre muaj. Gjatë asaj kohe Vukovari u shkatërrua plotësisht, ndërsa u dëbuan të paktën 22.000 anëtarë të popullatës joserbe. Disa mijëra u dërguan në kampet dhe u paraburgosën.

Vukovari ra në duart e forcave paraushtarake serbe dhe APJ-së më 18 nëntor 1991, dhe në mënyrë paqësore është ri-integruar në vitin 1998.