Turkish Airlines feston 91 vjetorin e themelimit

Turkish Airlines sot feston 91-vjetorin e themelimit të saj, duke vazhduar trashëgiminë e fluturimeve në shumicën e vendeve në mbarë botën me 350 destinacione, raporton Anadolu.

Kompania ajrore turke u themelua më 20 maj 1933, me vetëm pesë avionë dhe 24 anëtarë stafi, duke përfshirë shtatë pilotë.

Numri i avionëve u rrit në gjashtë vitin e ardhshëm, me një kapacitet pasagjerësh prej 64 persona.

Fluturimi i parë ndërkombëtar i Türkiyes u ngrit në vitin 1947 nga Istanbuli për në Athinë.

Destinacione të reja ndërkombëtare u shtuan në vitin 1951, duke përfshirë Lefkosa, Bejrut dhe Kajro, me një flotë prej 33 avionësh.

Në vitin 1956, Turkish Airlines iu bashkua IATA-s, shoqatës globale të kompanive ajrore.

Kompania ajrore shtoi pesë avionë Viscount 794 në flotën e saj, duke çuar në një epokë të re historinë e aviacionit turk, teksa kompania ajrore kaloi nga motorët me piston në motorët reaktiv.

Logoja e korporatës Turkish Airlines, e projektuar nga Mesut Manioğlu në vitin 1959, u frymëzua nga pata e egër, e njohur për kryerjen e fluturimeve ndërkontinentale në lartësitë 9.000 metra.

Punonjësit e kompanisë u rritën nga 30 në mbi 4.000 në 40 vjet.

Në 50 vjetorin e saj në 1983, Turkish Airlines transportonte 2,5 milionë pasagjerë çdo vit në SHBA, Evropë, Lindjen e Mesme dhe Azinë Lindore.

Një markë e re për transportin e mallrave u krijua brenda Turkish Airlines, e quajtur Turkish Cargo, në fillim të vitit 2000.

Fluturimet e brendshme të Turkish Airlines nga Aeroporti Sabiha Gökçen u nisën në vitin 2005.

Firma ndërkombëtare e vlerësimit të kompanive ajrore Skytrax ngriti në katër yje vlerësimin për Turkish Airlines në 2007.

AnadoluJet, nën-marka e Turkish Airlines me bazë në aeroportin Sabiha Gökçen, filloi fluturimet në vitin 2008.

Skytrax zgjodhi Turkish Airlines si kompaninë ajrore më të mirë në Evropë në 2011.

- Turkish Airlines fluturon në shumicën e vendeve të botës

Turkish Airlines u bë kompania ajrore që fluturon në shumicën e vendeve në mbarë botën në 2012, duke arritur në 200 destinacione, ndësa Skytrax njohu përpjekjet e kompanisë ajrore dhe e shpërbleu atë me çmimet "Kompania ajrore më e mirë në Evropë" dhe "Kateringu më i mirë i klasit të biznesit".

Numri i destinacioneve të Turkish Airlines arriti në 264 në 2014, duke u bërë kompania e katërt ajrore më e përhapur në botë.

Teksa Turkish Airlines priti 500 milionë pasagjerë deri në vitin 2015, Skytrax e emëroi transportuesin si Kompania ajrore më e mirë e Evropës për të pestën herë radhazi, duke vazhduar ta bëjë këtë edhe në 2016 dhe 2017.

Turkish Airlines ka transportuar 750 milionë pasagjerë deri në vitin 2018.

Kompania ajrore ndryshoi uniformat e saj për stafin ndërsa u zhvendos në Aeroportin e Istanbulit në 2018.

Turkish Airlines u bë kompania ajrore e 10-ta më e madhja në botë me një flotë prej 350 avionësh në vitin 2019.

Kompania ajrore turke fitoi çmimin APEX të Klasit Botëror në 2021, që ishte hera e parë që një kompani ajrore fitoi këtë çmim.

Turkish Airlines regjistroi udhëtarin e saj të miliardtë të transportuar në prill 2023, duke fituar çmimin "APEX 5-Star Global Airline".

Teksa Turkish Airlines kishte vetëm 65 avionë në vitin 2002, numri u rrit në 100 në 2006, 200 në 2012, 300 në 2016 dhe 456 në 2024.

Kompania ajrore synon të ketë flotën më të re dhe më moderne në të gjithë Evropën.