OPEC+ bie dakord që t'i përmbahet skemës aktuale të prodhimit

Organizata e Shteteve Eksportuese të Naftës (OPEC) dhe aleatët, të njohur bashkërisht si OPEC+, ranë dakord që t’i përmbahen politikës aktuale të prodhimit, transmeton Anadolu.

Vendimi erdhi në takimin e 47-të të Komitetit të Përbashkët Ministror të Monitorimit (JMMC) nëpërmjet videokonferencës.

Ministrat e vendeve prodhuese të naftës vendosën të vazhdojnë uljen e prodhimit të naftës me 2 milionë fuçi në ditë deri në fund të vitit 2023.

Takimi i ardhshëm ministror i grupit është caktuar për 3 prill.

OPEC+ më parë uli prodhimin ditor të naftës së papërpunuar me rreth 10 milionë fuçi në prill 2020 për shkak të rënies së kërkesës për shkak të pandemisë COVID-19.

Ndërsa ekonomitë globale dhe kërkesa për naftë filluan të rimëkëmbeshin, grupi filloi gradualisht të rrisë prodhimin nga prilli 2021.

Megjithatë, OPEC+ filloi të reduktojë prodhimin që nga tetori me synimin e “stabilizimit të tregjeve globale të naftës”.