Komiteti i Përhershëm për Bashkëpunim Ekonomik dhe Tregtar (COMCEC) i Organizatës së Bashkëpunimit Islam (OBI) po lançon programin e tij Al-Quds, i cili do të luajë rol kyç në mbështetjen e palestinezëve, veçanërisht grave dhe të rinjve, raporton Anadolu.

Seanca e 41-të e COMCEC-ut u mbajt në Stamboll më 1-4 nëntor për të diskutuar hapat që duhen ndërmarrë në Palestinë me projekte. Programi Al-Quds i COMCEC-ut, i lançuar në vitin 2020 synon të përmirësojë kushtet e jetesës së palestinezëve dhe të zhvillojë kapacitetet e tyre institucionale dhe njerëzore.

Rreth tetë projekte të tjera iu shtuan këtë vit 20 projekteve që do të zbatohen në kuadër të programit. Për më tepër, një thirrje e re e lançuar më 15 tetor, synon të rrisë numrin e palestinezëve që përfitojnë nga projektet që do të zbatohen në Kuds vitin e ardhshëm.

Turizmi, trashëgimia kulturore, arsimi teknik dhe profesional, punësimi dhe sipërmarrja, tregtia elektronike, mësimi elektronik dhe ndërmarrjet e vogla dhe të mesme (NVM) do të mbështeten me këtë program.

Deri më tani, në kuadër të programit COMCEC Al-Quds janë zbatuar rreth 28 projekte dhe një total prej 1.087 personash, kryesisht të rinj dhe gra, kanë përfituar nga rreth 80 aktivitete për zhvillimin e kapaciteteve.