Zelenskyy dhe Macron diskutojnë për paketën e mbështetjes dimërore për Ukrainën

Presidenti ukrainas Volodymyr Zelenskyy tha sot se është takuar me presidentin francez Emmanuel Macron në New York për të diskutuar mbi bashkëpunimin në siguri dhe paketën e mbështetjes dimërore për Ukrainën, transmeton Anadolu.

Në një deklaratë në platformën amerikane të mediave sociale X, Zelenskyy tha se bisedimet u përqendruan në sigurimin e sistemeve dhe raketave shtesë të mbrojtjes ajrore SAMP/T përmes financimit të disponueshëm në kuadër të një kuadri kredie të BE-së.

"Ne vazhdojmë të punojmë mbi mundësinë e prodhimit të sistemeve dhe raketave të tilla të mbrojtjes ajrore në Ukrainë si dhe mbi programin e përbashkët anti-balistik "FREYJA" me partnerët. Presim rezultatet e para këtë vit", tha ai.

Macron tha se zhvilloi diskutime "të thella" me Zelenskyyn mbi sulmet e Rusisë kundër infrastrukturës energjetike të Ukrainës, duke paralajmëruar se sulmet rrezikojnë të privojnë miliona familje nga ngrohja dhe energjia elektrike.

"Franca do të qëndrojë përkrah Ukrainës për t'u përballur me dimrin dhe grupi i Energjisë G7 do të mobilizohet gjithashtu në krah të saj", tha ai në X.

Macron njoftoi se Parisi dhe Kievi kanë nënshkruar kontratë për dërgimin e radarëve ndërsa Franca do t'i sigurojë Ukrainës edhe interceptorë për të përforcuar mbrojtjen e saj ajrore.

Ai shtoi se ka diskutuar mbështetjen për Ukrainën me presidentin e SHBA-së, Donald Trump, si dhe mundësinë e një armëpushimi energjetik dhe një moratoriumi në Detin e Zi.