Shtetet e Paqësorit, Zelanda e Re dhe Australia janë ndër të parat që hynë në Vitin e Ri 2023, raporton Anadolu Agency (AA).
Në Zelandën e Re fishekzjarrët e ndriçuan qiellin mbi qytetin më të madh, Auckland, ndërkaq në Australi festa më e madhe u shënua në Sidnej.
Sipas lajmeve të "New Zealand Herald", vendi ishullor i tha "përshëndetje" vitit 2023.
Viti i Ri u prit me pamje spektakolare të fishekzjarreve në Auckland dhe Wellington të Zelandës së Re.
Kulla "Sky Tower" në Auckland u ndriçua me pamje të dritave të veçanta për Vitin e Ri.
Ndërsa në Australi, një numër i madh i vizitorëve shijuan atmosferën e fishekzjarreve spektakolare të Vitit të Ri mbi Shtëpinë e famshme të Operës në Sidnej dhe Urën e Sidnejit.
Shtetet Samoa, Kiribati dhe Zelanda e Re ishin të parat që hynë në vitin kalendarik 2023 dhe më pas Fixhi dhe Australia.
Qytetarët kishin rastin t'i shohin fishekzjarret edhe nga anijet ndërsa shumë i prisnin në fushë, e cila ofron pamjen më të mirë të spektaklit.
