Presidenti i Asamblesë Kombëtare të Venezuelës, Jorge Rodriguez deklaroi se SHBA-ja po krijon hapësirë ​​për trafikantët e drogës në Detin e Karaibeve, transmeton Anadolu.

Duke folur në një takim të Këshillit Kombëtar të Sovranitetit dhe Paqes në kryeqytetin Karakas, Rodriguez kritikoi aktivitetin ushtarak amerikan në rajonin e Karaibeve.

Ai akuzoi SHBA-në se po krijon hapësirë ​​për trafikantët e drogës. "Nëse Washingtoni do të donte vërtet të luftonte trafikun e drogës, do të merrte parasysh që 85 për qind e drogës që arrin në SHBA kalon nëpër Paqësor", tha Rodriguez.

Sipas tij, qëllimi i vërtetë i SHBA-së është të rrethojë Venezuelën dhe në fund të sekuestrojë burimet natyrore të vendit.

"Trafikantët e drogës në Ekuador si dhe ata në Peru, Republikën Dominikane, Kolumbi dhe Meksikë, ndoshta janë shumë të lumtur. Kërcënimet në Karaibe, veçanërisht kundër Venezuelës, po krijojnë hapësirë ​​për ta", theksoi Rodriguez.

Ai thotë se ata i kushtojnë shumë rëndësi sigurisë në vend. "Ju sigurojmë se Venezuela është vend më i sigurt sot sesa SHBA-ja, Ekuadori, Peruja, Paraguai, Republika Dominikane dhe Panamaja", tha presidenti i Asamblesë Kombëtare të Venezuelës.

- Sulm ndaj anijes që dyshohet se po kontrabandonte drogë

Presidenti i SHBA-së, Donald Trump njoftoi se një sulm është kryer ndaj një anijeje në brigjet e Venezuelës, e cila dyshohet se është përfshirë në kontrabandën e drogës.

Trump deklaroi se sulmi ndodhi në ujërat ndërkombëtare, duke vënë në dukje se gjashtë persona në anije u vranë në sulm, ndërsa asnjë ushtar amerikan nuk u lëndua.

Një forcë detare e përbërë nga një nëndetëse dhe shtatë anije luftarake u dërgua në rajonin e Karaibeve në brigjet e Venezuelës me udhëzimin e Trumpit. Sekretari i Mbrojtjes i SHBA-së, Pete Hegseth tha se ushtria amerikane ishte gati për operacione në Venezuelë, përfshirë ndryshimin e regjimit.

Synimi i SHBA-së ndaj disa anijeve në brigjet e Venezuelës për "kontrabandë droge" ka tërhequr kritika si nga qeveria venezueliane ashtu edhe nga bashkësia ndërkombëtare, me disa që argumentojnë se sulmet ishin "në shkelje të ligjit ndërkombëtar".