Shtëpia e Bardhë ka konfirmuar për Anadolu se SHBA-ja po shqyrton një pezullim të përkohshëm të Ligjit Jones, një ligj detar mbi një shekull të vjetër, për të siguruar furnizime të pandërprera me energji dhe produkte bujqësore drejt porteve amerikane mes ndërprerjeve të shkaktuara nga lufta me Iranin.

“Në interes të mbrojtjes kombëtare, Shtëpia e Bardhë po shqyrton pezullimin e Ligjit Jones për një periudhë të kufizuar kohore për të siguruar që produktet jetike të energjisë dhe nevojat bujqësore të rrjedhin lirshëm drejt porteve të SHBA-së”, tha zëdhënësja Karoline Leavitt, duke shtuar se vendimi ende nuk është finalizuar.

Një tjetër zyrtar i Shtëpisë së Bardhë siguroi se çdo pezullim i mundshëm nuk do të ndikojë në industrinë amerikane të ndërtimit të anijeve.

Ligji Jones, i njohur zyrtarisht si Neni 27 i Aktit të Marinës Tregtare të vitit 1920, kërkon që të gjitha mallrat e transportuara me rrugë detare mes porteve amerikane të transportohen me anije të ndërtuara në SHBA, me flamur amerikan, si dhe në pronësi dhe të drejtuara nga shtetas amerikanë ose banorë të përhershëm.

Një pezullim do t’u lejonte anijeve të huaja të mbushin boshllëkun gjatë ndërprerjeve të furnizimit.

Përshkallëzimi në Lindjen e Mesme është rritur që kur Izraeli dhe SHBA-ja nisën një sulm të përbashkët kundër Iranit më 28 shkurt, duke ndërprerë transportin detar përmes Ngushticës së Hormuzit.