Shkon në 46 numri i viktimave nga përleshja në burgun e grave në Honduras

Rritet në 46 numri i të burgosurve që kanë humbur jetën në përleshjen e shënuar në burgun e grave në shtetin e Amerikës Qendrore, Honduras, transmeton Anadolu.

Njoftohet se edhe 5 gra të tjera kanë humbur jetën në trazirat dhe përleshjet që u shënuan ditë më parë në burgun e grave në zonën Tamara në kryeqytetin Tegucigalpa të Hondurasit.

Në sherrin mes bandave Mara Salvatrucha dhe Barrio 18, thuhet se 26 gra u vranë duke u djegur ndërsa 20 të tjera me armë ose me thikë.

Bëhet e ditur se vazhdojnë trajtimin në spital 7 gra që u plagosën në ngjarjet ku të burgosurat u mbyllën nëpër qeli dhe u dogjën.

- Ministri i drejtësisë shkarkohet nga detyra

Presidentja e Hondurasit, Xiomara Castro i ka cilësuar "jashtëzakonisht të tmerrshme" ngjarjet.

Castro ka deklaruar se rebelimi është planifikuar nga bandat e rrugëve "me dijeninë dhe pëlqimin e zyrtarëve të sigurisë".

Presidentja Castro, shkarkoi nga detyra ministrin e sigurisë, Ramon Sabillo dhe në vend të tij emëroi drejtorin e përgjithshëm të policisë, Gustavo Sanchez.

Në anën tjetër zëdhënësi i ministrisë së sigurisë, Miguel Martinez, ka shprehur se sulmi ka qenë i "planifikuar".

Martinez, vuri në dukje se kamerat e sigurisë po regjistronin deri në momentet kur anëtarët e bandës neutralizuan gardianët dhe morën çelësat, ndërsa më pas janë thyer.

Më 20 qershor, një trazirë dhe përleshje shpërtheu në burgun e grave në zonën Tamara në kryeqytetin Tegucigalpa të Honduras-it.

Për shkak të përleshjeve mes bandave Mara Salvatrucha dhe Barrio 18, përreth burgut u dërguan forca të shumta sigurie.