SHBA vendos sanksione të reja ndaj regjimit sirian

SHBA sot njoftoi një fushatë të re të "sanksioneve të qëndrueshme" kundër regjimit sirian dhe aleatëve të tij, transmeton Anadolu Agency (AA).

Mike Pompeo, Sekretari i Shtetit i SHBA-së, tha se "sanksionet e rënda ekonomike" sipas Aktit Caesar kanë për qëllim mbajtjen e regjimit të Bashar al-Asadit dhe mbështetësve të tij përgjegjës për veprimet brutale kundër sirianëve që kanë pësuar luftën më të keqe gjatë një dekade.

"Sot ne po fillojmë një fushatë të qëndrueshme të sanksioneve kundër regjimit të Asadit nën Aktin Caesar, i cili autorizon sanksione të ashpra ekonomike për të mbajtur përgjegjës regjimin e Asadit dhe mbështetësit e tij të huaj për veprimet e tyre brutale kundër popullit sirian", tha Pompeo në Twitter.

"Shumë sanksione të tjera do të vijnë derisa Asad dhe regjimi i tij të ndalojnë luftën e tyre të panevojshme dhe brutale dhe të bien dakord për një zgjidhje politike siç kërkohet nga Rezoluta 2254 e Këshillit të Sigurimit të OKB-së," shtoi ai, duke iu referuar një rezolute që bën thirrje për armëpushim dhe zgjidhje politike në Siri.

Dhjetorin e kaluar, presidenti amerikan Donald Trump nënshkroi një projektligj për sanksione në Siri, si pjesë e buxhetit të mbrojtjes për vitin 2020.

Projektligji, i njohur zyrtarisht si Akti i Mbrojtjes Civile Siriane Caesar 2019, autorizon sanksione shtesë dhe kufizime financiare për institucionet dhe individët që kanë lidhje tregtare me regjimin sirian.

Akti është emëruar sipas një fotografi ushtarak sirian që zbuloi dhjetëra mijëra imazhe të tmerrshme që treguan 11 mijë viktima të torturuar sistematikisht deri në vdekje nga regjimi.

Sanksione të reja

Në përpjekje për të ndëshkuar të gjithë personat që kanë lidhje me regjimin e Asadit, diplomati i lartë amerikan tha në një deklaratë më vonë se bashkëpunëtorët e regjimit janë "të ekspozuar potencialisht ndaj kufizimeve të udhëtimit dhe sanksioneve financiare."

Sanksionet përfshijnë 39 zyrtarë të lartë sirianë, përfshirë Bashar al-Asadin dhe gruan e tij Asma al-Asad dhe do të hyjnë në fuqi menjëherë sipas Aktit Caesar dhe Urdhrit Ekzekutiv 13894.

Pompeo bëri një shënim të veçantë mbi gruan e Bashar al-Asadit. Ai akuzoi atë dhe familjen e saj Akhras si "përfitues të njohur të luftës".

"Tani kushdo që bën biznes me ndonjë nga këta persona ose subjekte rrezikohet nga sanksionet", shtoi ai.

Pompeo tha se do të vazhdojë "bashkëpunimi i plotë me kombet e tjera bashkëmendimtare, veçanërisht partnerët evropianë, të cilët vetëm tri javë më parë rinovuan sanksionet e tyre kundër regjimit të Asadit".