SHBA miraton 40 miliardë dollarë ndihmë për Ukrainën

Senati i SHBA-së miratoi pakon e ndihmës prej 40 miliardë dollarë për Ukrainën, raporton Anadolu Agency (AA).

Pakoja e ndihmës u miratua nga Dhoma e Përfaqësuesve e SHBA-së javën e kaluar ndërkaq vendimi pritet të miratohet së shpejti nga presidenti amerikan Joe Biden.

Pakoja është dukshëm më e lartë nga 33 miliardë dollarë që Biden kërkoi fillimisht nga Kongresi në prill.

Pakoja e miratuar e ndihmës përfshin ndihmë të re ushtarake dhe ekonomike për Ukrainën dhe 5 miliardë dollarë për të ndihmuar në përgjigjen globale ndaj krizës në rritje të pasigurisë ushqimore dhe rritjes së çmimeve të ushqimeve të shkaktuara nga sulmi rus. Ukraina është një nga eksportuesit kryesor të ushqimit dhe lufta ka pasur pasoja shkatërruese për tregjet globale bujqësore.

Në mars, Kongresi miratoi 13.6 miliardë dollarë ndihmë për Ukrainën.