Fatma Zehra Solmaz
22 shtator 2026•Përditësim: 22 shtator 2026
Shteti amerikan i Floridës ka konfirmuar vdekjen e parë të lidhur me dengun këtë vit ndërsa rastet e sëmundjes së transmetuar nga mushkonjat kanë arritur në 152, numri më i lartë vjetor që nga viti 2023, transmeton Anadolu.
"Tampa Bay Times", që raportoi i pari për vdekjen, e identifikoi pacienten si një grua 80-vjeçare nga Tampa, e cila vdiq më 4 shtator. Departamenti i Shëndetësisë i Floridës konfirmoi vdekjen, por refuzoi të publikojë detaje personale, duke iu referuar mbrojtjes së privatësisë, raportoi të hënën ABC News.
"Departamenti ka përfunduar hetimin e tij epidemiologjik dhe konfirmon vdekjen e parë të lidhur me dengun në qarkun Hillsborough. Për të mbrojtur privatësinë e individit, detajet dhe informacionet shtesë lidhur me rastin janë konfidenciale", tha një zëdhënës i departamentit për ABC News.
Florida ka regjistruar 152 raste të marra lokalisht të dengut këtë vit deri në javën që përfundoi më 12 shtator, sipas të dhënave të Departamentit shtetëror të Shëndetësisë. Ky është numri më i lartë vjetor që nga viti 2023, kur shteti regjistroi 189 raste të marra lokalisht, sipas Qendrave për Kontrollin dhe Parandalimin e Sëmundjeve (CDC).
Qarku Hillsborough, ku përfshihet Tampa përbënte 134 raste. Raste u raportuan gjithashtu në qarqet Miami-Dade, Orange, Palm Beach, Pasco dhe Pinellas. Dengu përhapet përmes pickimit nga mushkonjat e infektuara Aedes, të cilat mund të transmetojnë gjithashtu viruset Zika dhe Chikungunya.
Sipas CDC-së, rreth një në katër persona të infektuar me deng shfaqin simptoma, përfshirë temperaturë, skuqje të lëkurës dhe dhimbje muskulore. Rreth një në 20 persona që sëmuren zhvillojnë deng të rëndë, i cili mund të shkaktojë gjakderdhje të brendshme, shok dhe vdekje.
Nuk ka ilaç specifik për trajtimin e dengut. CDC rekomandon pushim, konsumim të lëngjeve dhe acetaminofen për temperaturën dhe dhimbjet ndërsa këshillon pacientët të shmangin aspirinën dhe ibuprofenin për shkak të rrezikut të gjakderdhjes. Dengu i rëndë kërkon trajtim të menjëhershëm mjekësor.
Aktualisht nuk ka vaksina aktive kundër dengut në dispozicion në SHBA, pasi vaksina e vetme e miratuar u hoq nga prodhuesi për shkak të kërkesës së ulët globale dhe rezervat e mbetura skadojnë në vitin 2026.
CDC-ja rekomandon përdorimin e mjeteve kundër mushkonjave, veshjen e rrobave me mëngë të gjata dhe pantallonave, përdorimin e ajrit të kondicionuar ose rrjetave në dritare si dhe eliminimin e ujërave të ndenjura ku mund të shumohen mushkonjat.
