Kanë kaluar 32 vjet nga bashkimi i Republikës Federale të Gjermanisë (Gjermania Perëndimore) dhe Republikës Demokratike Gjermane (Gjermania Lindore).
Pasi Gjermania humbi Luftën e Dytë Botërore, forcat pushtuese të SHBA-së, Francës dhe Britanisë bashkuan njësitë e tyre administrative dhe në vitin 1949 Gjermania u nda në dy pjesë, Republika Demokratike Gjermane (Gjermania Lindore) e cila ishte nën ndikimin e Bashkimit të Republikave Socialiste Sovjetike (BRSS) në lindje, me një sistem socialist dhe Republika Federale e Gjermanisë (BRD) në perëndim.
Kur dhjetëra mijëra njerëz filluan të iknin në Gjermaninë Perëndimore për shkak të moszhvillimit ekonomik të Gjermanisë Lindore, administrata e Gjermanisë Lindore fillimisht u përpoq të parandalonte këto arratisje dhe më pas ndërtoi Murin e Berlinit në 1961.
Procesi i reformës, i cili filloi në Poloni dhe ish-Çekosllovaki me politikën e hapjes dhe ristrukturimit të Presidentit të BRSS-së, Mikhail Gorbachev në vitet 1980, preku Gjermaninë Lindore si dhe të gjitha vendet e Bllokut Lindor.
Populli i Gjermanisë Lindore doli në rrugë kundër regjimit në fund të viteve 1980. Si rezultat i protestave intensive, Muri i Berlinit, i njohur si "Muri i Turpit", u shemb më 9 nëntor 1989. Qeveria e Republikës Federale të Gjermanisë, e cila e pa këtë situatë si një mundësi, e mori Gjermaninë Lindore nën kontrollin e saj pas negociatave me BRSS dhe forcat e tjera pushtuese.
Këto dy shtete gjermane me dy sisteme të ndryshme politike u bashkuan më 3 tetor 1990, pas më shumë se 40 vitesh ndarje.
Sot, megjithëse thuhet se ka dallime në standardin e jetesës dhe botëkuptimin midis njerëzve që jetojnë në lindje dhe perëndim të Gjermanisë, shumica e gjermanëve e konsiderojnë pozitiv bashkimin.
Sipas hulumtimit të organizuar nga përgjegjësi i qeverisë lindore gjermane, Carsten Schneider, 61 për qind e gjermanëve e shohin bashkimin si fitim.
Në raport thuhet se perceptimi i gjermano-lindorëve si qytetarë të dorës së dytë u ul me 4 pikë përqindjeje në 38 për qind në vitin 2022 krahasuar me vitin 2020. Kjo normë është 63 për qind në lindje të vendit dhe 33 për qind në perëndim.
"Është kaq magjepsëse kjo që ka ndodhur"
Ursula Winter, e cila jeton në Berlin, për Anadolu Agency (AA) tha se ribashkimi i dy Gjermanive ende nuk ishte përfunduar plotësisht në mendjet e njerëzve. "Si fëmijë, nuk mund ta imagjinoja se kjo do të ndodhte (ribashkimi i Gjermanive). Ndoshta mendova se do ta shihja kur të bëhesha gjyshe. Është kaq magjepsëse kjo që ka ndodhur. Ekziston një Gjermani, edhe pse nuk është formuar plotësisht në mendjet e njerëzve".
"Jam shumë mirënjohës për atë që ka ndodhur në histori"
Prokurori 88-vjeçar në pension, Wolfgang Pfaff, deklaroi se ribashkimi i dy Gjermanive tashmë është bërë një gjë e zakonshme. "Ndoshta kjo është pak më ndryshe në lindje të Gjermanisë. Unë jam me origjinë nga jugu i Gjermanisë, e krahasoj këtë gjatë gjithë kohës. Diçka më shumë duhet bërë në Gjermaninë Lindore. Duhet ta themi këtë", tha Pfaff.
Në lidhje me atë nëse ka dallime mes njerëzve që jetojnë në lindje dhe perëndim të vendit, Paff tha: "Në përgjithësi, kjo është përmirësuar, por ende të moshuarit si unë e trajtojnë Gjermaninë Lindore ndryshe nga të rinjtë. Sigurisht, nëse marrim Gjermaninë Lindore, ky ishte një sistem në të cilin funksiononin shërbimet sekrete dhe pati zhvillime shumë negative. Kjo është një temë që unë e vlerësoj nga profesioni im i vjetër".
Duke shpjeguar se ai ishte prokuror në Prokurorinë Federale në qytetin e Karlsruhe-s gjatë periudhës së ribashkimit gjerman, Paff tha: "Për mua, kjo ishte një ngjarje e madhe. As perëndimi i Gjermanisë nuk ishte i lirë. Ne nuk i kishim mundësitë e sovranitetit absolut, por e gjithë kjo erdhi më vonë me ribashkimin".
Duke theksuar se është i lumtur me ribashkimin e dy Gjermanive, Pfaff tha: "Në këtë kontekst, jam shumë mirënjohës për atë që ka ndodhur në histori".
"Duhet të përjetoheshin vështirësi, nuk kishte alternativë tjetër"
Helga, e cila nuk ka dashur të tregojë mbiemrin e saj dhe jeton në Berlin me bashkëshortin e saj Manfred, ka deklaruar gjithashtu se periudha kur dy Gjermanitë janë bashkuar ka qenë shumë emocionuese për ta dhe tha se: "Kanë ndryshuar shumë gjëra në këtë periudhë".
Duke kujtuar përvojat e tyre në Gjermaninë Lindore, Helga tha: "Ka vështirësi. Në Berlin më pak, por sfidat dhe dallimet janë të mëdha në fshat".
"Në thelb, është e nevojshme të shihet se socializimi midis Gjermanisë Lindore dhe Perëndimore është i ndryshëm për këtë çështje," tha Manfred.
Duke thënë se punonjësit kishin vështirësi të mësoheshin me sistemin e ri pas bashkimit të dy vendeve, Manfred tha: "Si sigurimi, banka dhe gjëra të ngjashme. Ishte e vështirë, por nuk kishte alternativë. Ishte e nevojshme t'i kalonim këto vështirësi".
Helga dhe Manfredi u shprehën të lumtur për rënien e murit dhe ribashkimin e dy Gjermanive.
