Rusi, vazhdon rritja e rasteve me COVID-19

Rusia ende nuk ka parë ulje të vdekjeve dhe infeksioneve nga koronavirusi i ri (COVID-19) që tregon se shpërthimi ende nuk ka arritur kulmin, transmeton Anadolu Agency (AA).

Ekipi i urgjencës tha se sot 5.236 persona të tjerë rezultuan pozitiv me COVID-19, një rritje prej 9.9 për qind, duke e rritur numrin e rasteve në 57.999.

Ndërkohë, numri i vdekjeve u rrit në 513, me 57 vdekje të reja. Gjithsej 4.420 persona janë shëruar pas kontraktimit të virusit.

Ndërsa gati gjysma e personave që bartin virusin nuk shfaqin simptoma, qeveria ka rritur testimet. Janë kryer 2.5 milionë testime.

Vendi është nën bllokim deri më 30 prill ndërsa pritet zgjatja e masave. Shkencëtarët po përpiqen të gjejnë një vaksinë për virusin i cili ka bërë kërdi në të gjithë botën.

Koronavirusi është përhapur në të gjithë botën që nga shfaqja në Kinë, dhjetorin e kaluar.

Më shumë se 2.56 milionë raste janë raportuar në të gjithë botën, me mbi 177.500 të vdekur, tregojnë të dhënat e përpiluara nga Universiteti "Johns Hopkins" me qendër në SHBA.