Putin takohet me presidentin e Iranit, Raisi

Presidenti i Rusisë, Vladimir Putin u takua me presidentin e Iranit, Ebrahim Raisi përpara Samitit të Organizatës së Bashkëpunimit të Shangait (SCO) që do të mbahet në Samarkand të Uzbekistanit, transmeton Anadolu Agency (AA).

Sipas njoftimit të Kremlinit, në fjalimin e tij në fillim të takimit Putin deklaroi se marrëdhëniet midis Rusisë dhe Iranit po zhvillohen në të gjitha drejtimet.

Duke theksuar se ata po bëjnë gjithçka për të siguruar që Irani të bëhet anëtar i plotë i SCO-së, Putin theksoi se edhe partnerët e tjerë mbështesin aplikimin e Iranit.

“Mbetet vetëm formaliteti i fundit, në fakt është thjesht një formalitet dhe Irani tashmë po i bashkohet kësaj organizate ndërkombëtare serioze, të madhe dhe autoritare. Ne jemi shumë të lumtur me këtë", tha Putin.

Ai tha se bashkëpunimi midis dy vendeve, përfshirë në fushat e teknologjisë së lartë, është zhvilluar pozitivisht. Putin kujtoi se sateliti "Khayyam", i prodhuar nga ndërmarrjet ruse me porosi të Iranit, u lëshua nga kozmodromi "Baikonur" më 9 gusht.

Putin potencoi se një marrëveshje e re e madhe midis Rusisë dhe Iranit është në fazën përfundimtare të punës që do të mundësojë kalimin e marrëdhënieve midis Rusisë dhe Iranit në nivelin e partneritetit strategjik. Presidenti rus tha se tregtia e ndërsjellë u rrit me 81 për qind vitin e kaluar dhe u rrit me 30 për qind më shumë në 5 muajt e parë të këtij viti.

"Komisioni ndërqeveritar po punon në mënyrë aktive. Javën e ardhshme do të dërgojmë në Iran një delegacion të përbërë nga biznesmenë, ku do të marrin pjesë rreth 80 përfaqësues të kompanive ruse", tha Putin.