Elena Teslova
03 Shtator 2024•Përditësim: 03 Shtator 2024
Presidenti rus Vladimir Putin mbërriti të hënën në Mongoli, vizita e tij e parë në një vend që është anëtar i Gjykatës Ndërkombëtare Penale (GJNP) që kur gjykata lëshoi urdhër arresti për të në mars të vitit 2023, transmeton Anadolu.
“Vladimir Putin mbërriti në Mongoli për një vizitë zyrtare me ftesë të Presidentit të Mongolisë Ukhnaagiin Khurelsukh, për të marrë pjesë në festimet e 85-vjetorit të fitores së përbashkët të forcave të armatosura sovjetike dhe mongole mbi militaristët japonezë në Lumin Khalkhin Gol”, tha Kremlini në një deklaratë.
Vizita e Putinit do të zgjasë dy ditë dhe të martën janë planifikuar disa takime dypalëshe, duke përfshirë presidentin Khurelsukh, si dhe nënshkrimi i disa dokumenteve dhe vendosja e luleve në monumentin e Marshalit të Bashkimit Sovjetik Georgy Zhukov.
“Gjatë bisedimeve të tyre, të dy udhëheqësit do të diskutojnë perspektivat për zhvillimin e mëtejshëm të marrëdhënieve ruso-mongole të partneritetit strategjik gjithëpërfshirës dhe do të shkëmbejnë pikëpamjet mbi çështjet aktuale ndërkombëtare dhe rajonale”, tha Kremlini.
Autoritetet mongole nuk kanë treguar asnjë qëllim për të arrestuar liderin rus me urdhër të GJNP-së dhe në vend të kësaj organizuan një ceremoni mirëseardhjeje. Putin u prit nga një roje nderi në aeroportin e kryeqytetit Ulaanbaatar.
Putin pritet të zhvillojë gjithashtu bisedime me kryetarin e parlamentit të Mongolisë Dashzegve Amarbayasgalan dhe kryeministrin Luvsannamsrain Oyun-Erdene.
Më 17 mars 2023, GJNP-ja lëshoi një urdhër arresti për Putinin me kërkesë të prokurorit Karim Khan.
Gjykata me bazë në Hagë akuzoi Putinin për dëbimin e paligjshëm të fëmijëve nga Ukraina pas nisjes së “operacionit special ushtarak” në shkurt 2022.
Rusia mohon akuzat, duke këmbëngulur se fëmijët janë evakuuar nga zona e betejës për të shpëtuar jetën e tyre dhe se urdhri nuk është i zbatueshëm pasi vendi nuk është një vend anëtar i GJNP-së.
