OpenAI ndalon llogaritë e lidhura me operacionet ruse dhe iraniane të ndikimit

OpenAI njoftoi se ka ndaluar llogaritë e lidhura me operacione të fshehta ndikimi me origjinë nga Rusia dhe Irani, të cilat përdorën mjetet e saj të inteligjencës artificiale në përpjekje për të ndikuar në opinionin publik jashtë vendit, transmeton Anadolu.

Në një postim në blog, kompania tha se operacionet ndërthurën inteligjencën artificiale me teknika tradicionale ndikimi, duke përdorur platforma kërkimore që dukeshin legjitime dhe identitete të sajuara gazetarësh për të përhapur mesazhe gjeopolitike.

Fushata e lidhur me Rusinë përdori një platformë të pretenduar kërkimore të përqendruar në Amerikën Latine, ndërsa operacioni i lidhur me Iranin përdori profile të rreme gazetarësh për t'u propozuar artikuj botimeve online.

"Ajo që bie më shumë në sy në këto operacione është se ato ngjanin shumë me operacionet komplekse të ndikimit të periudhës para inteligjencës artificiale, por përdorën IA-në për t'i lehtësuar disa procese pune", tha OpenAI.

Kompania tha se kishte ndaluar grupe llogarish në ChatGPT të lidhura me të dy operacionet dhe kishte ndarë informacione për to me autoritetet përkatëse.

- Gazetarë të rremë publikuan artikuj në internet

OpenAI tha se operacioni i lidhur me Iranin përdori shtatë identitete të sajuara gazetarësh për t'u propozuar artikuj të gjatë botimeve online. Kompania identifikoi afro 100 artikuj të publikuar me emrat e gazetarëve të rremë në më shumë se një duzinë mediash.

Artikujt trajtonin çështje ndërkombëtare, gjeopolitikën dhe Lindjen e Mesme. Sipas OpenAI, publikimi i tyre u rrit ndjeshëm pas shpërthimit të konfliktit mes SHBA-së dhe Iranit.

Sipas kompanisë, organizatorët përdorën ChatGPT-në për të redaktuar artikujt, për të kontrolluar draftet në përputhje me kërkesat e veçanta të secilit botim dhe për të përgatitur email-e me propozime për publikimin e artikujve, të cilat ua dërgonin redaktorëve.

Profilet e rreme paraqiteshin si gazetarë perëndimorë me ekspertizë në politikën ndërkombëtare, Lindjen e Mesme, të drejtat e njeriut ose konfliktet, tha kompania. Operacioni gjeneroi gjithashtu komente për rrjetet sociale në anglisht dhe persisht.

"Përdoruesit kërkuan komente për tema të tilla si sulmet me raketa, armëpushimet dhe manovrat diplomatike, duke specifikuar që rezultatet ta paraqisnin SHBA-në si agresore, Izraelin si aleat jo të besueshëm të SHBA-së dhe Iranin si viktimë sfiduese, por të qëndrueshme", tha OpenAI.

Megjithatë, kompania tha se komentet që identifikoi publikisht përgjithësisht morën pak reagime. Disa pëlqime erdhën nga llogari të lidhura me vetë operacionin, shtoi ajo.

- Fushata e lidhur me Rusinë shënjestroi Ukrainën dhe Amerikën Latine

OpenAI tha se operacioni i lidhur me Rusinë shënjestroi audiencat në të gjithë Amerikën Latine, ku pjesa më e madhe e veprimtarisë dukej se synonte "të dëmtonte reputacionin e Ukrainës". Përpjekje të tjera u përqendruan në politikën e brendshme të Argjentinës dhe Bolivisë.

Sipas pretendimeve, operacioni përdori Qendrën e Kërkimeve Sociale (Social Research Center), një platformë që vetëpërshkruhej si një platformë kërkimore për Amerikën Latine. OpenAI tha se raportet e brendshme sugjeronin se platforma kontrollohej nga operatorë rusë përmes një identiteti të sajuar me emrin "Mia Clark".

Kompania tha se provat e disponueshme tregonin se punonjësit që punonin për platformën në Amerikën Latine nuk e dinin se po punonin për një grup rus. Ata duket se zhvillonin intervista me ekspertë rajonalë dhe përgatitnin punime kërkimore në mirëbesim.

Raportet e brendshme të organizatorëve përshkruanin përpjekje për të përhapur lajme, dokumente dhe regjistrime audio të fabrikuara, që shënjestronin Ukrainën dhe figura politike në rajon.

OpenAI tha se kërkimet e saj zbuluan materiale që përputheshin me disa nga fushatat e raportuara, përfshirë pretendime të rreme që nxitën verifikime faktesh dhe përgënjeshtrime zyrtare. Megjithatë, kompania paralajmëroi se disa pretendime në raportet e brendshme nuk mundën të konfirmoheshin.

OpenAI tha se të dy operacionet publikuan përmbajtje në media, duke zgjeruar potencialisht shtrirjen e tyre përtej llogarive të rreme në rrjetet sociale. "Inteligjenca artificiale mund t'u japë këtyre operacioneve të maskuara shkallë më të gjerë, efikasitet, rrjedhshmëri gjuhësore dhe aftësi më të mira redaktuese", tha kompania.

OpenAI tha se publikoi gjetjet për të ndihmuar studiuesit dhe organizatat e tjera të identifikojnë dhe të ndërpresin fushata të ngjashme.