OKB: DEASH ka mbajtur 6.000 deri në 10.000 luftëtarë në Irak dhe Siri

Vlerësohet se mes 6.000 deri në 10.000 luftëtarë veprojnë nën grupin terrorist DEASH në Irak dhe Siri, theksoi Vladimir Voronkov, zyrtar i Kombeve të Bashkuara (OKB) për luftë kundër terrorizmit, transmeton Anadolu Agency (AA).

Nënsekretari i Zyrës kundër terrorizmit të OKB-së në një konferencë të Këshillit të Sigurimit tha se grupi ka ruajtur aftësinë e tij për të nisur sulme të reja, duke përfshirë prita dhe vendosjen e bombave anash rrugës në të dy vendet.

"Gjithashtu vazhdoi të sulmojë forcat qeveritare dhe civilët me qëllimin e qartë për të krijuar panik dhe për të rritur presionin mbi autoritetet", tha Voronkov.

Ai paralajmëroi se DEASH është i njohur për aftësinë e tij për t'u rigrupuar dhe madje për të intensifikuar aktivitetet e tij pas humbjeve të mëdha.

"Operacionet antiterroriste mund të jenë të nevojshme, por nevojiten masa gjithëpërfshirëse me një fokus të fortë në parandalimin për të zgjidhur dinamikën që nxit atraksionin e terrorizmit", shtoi Voronkov.

Javën e kaluar, lideri i DEASH-it, Abu Ibrahim al-Hashimi al-Qurayshi, humbi jetën pasi hodhi veten në erë gjatë një operacioni të forcave amerikane në veri të Sirisë. Al-Qurayshi, emri i vërtetë i të cilit ishte Amir Muhammad Saeed Abdul Rahman Al-Mawla, mori drejtimin pasi Abu Bakr al-Baghdadi u vra nga SHBA-ja në vitin 2019.

"Ne duhet të fokusohemi në rivendosjen e dinjitetit njerëzor, besimit dhe kohezionit social. Kjo duhet të fillojë me zgjidhjen e situatës së dëshpëruar në kampet për persona të zhvendosur dhe objektet e paraburgimit anembanë Sirisë dhe Irakut", tha zyrtari i OKB-së.