Ömer Tuğrul Çam
17 Dhjetor 2021•Përditësim: 17 Dhjetor 2021
NATO ka theksuar se një agresion i ri nga Rusia kundër Ukrainës do të ketë kosto të rëndë dhe njoftoi se është e gatshme të punojë mbi masat për rritjen e besimit nëse Rusia ul tensionet, transmeton Anadolu Agency (AA).
Këshilli i Atlantikut të Veriut, organi vendimmarrës i NATO-s bëri një deklaratë lidhur me "situatën në Ukrainë dhe përreth saj".
"Ka shqetësim serioz për fortifikimin që Rusia ka bërë muajt e fundit në kufirin me Ukrainën. I bëjmë thirrje Rusisë që urgjentisht të ulë tensionet, të ndjekë kanalet diplomatike dhe t'u përmbahet angazhimeve ndërkombëtare për transparencën e aktiviteteve të saj ushtarake", thuhet në deklaratë.
"Po vlerësojmë në mënyrë serioze efektet e situatës aktuale ndaj sigurisë së aleancës", theksohet në deklaratën ku më tej bëhet e ditur se NATO do të përgjigjet në mënyrë të vendosur ndaj prishjes së mjedisit të sigurisë.
"Çdo agresivitet i mëtejshëm kundër Ukrainës do të ketë pasoja të mëdha dhe kosto të rëndë", thuhet në deklaratën në të cilën konfirmohet edhe njëherë mbështetja për sovranitetin dhe integritetin territorial të Ukrainës dhe në të cilën nga Rusia kërkohet që të tërheqë forcat e saj nga Ukraina.
Duke iu referuar kundërshtimit të Rusisë për anëtarësimin e Ukrainës në NATO, ndër të tjera thuhet se çdo vend ka të drejtën e tij të përcaktojë fatin dhe politikën e tij të jashtme. "Marrëdhëniet e NATO-s me Ukrainën i interesojnë vetëm Ukrainës dhe 30 vendeve anëtare", theksohet në deklaratë.
Gjithashtu në deklaratën e NATO-s, Rusisë i përsëritet ftesa për zhvillimin e Këshillit NATO-Rusi dhe i jepet mesazhi se "Jemi të gatshëm për dialog kuptimplotë me Rusinë".
"Nëse Rusia ndërmerr hapa konkretë për të ulur tensionet ne jemi të gatshëm të punojmë për forcimin e masave të ndërtimit të besimit. Edhe OSBE-ja gjithashtu është një platformë", vihet në dukje në deklaratën e NATO-s.
