Macron dhe Merkel tentojnë të tregojnë unitet të BE-së në prag të Brexit-it

Presidenti francez, Emmanuel Macron dhe kancelarja gjermane, Angela Merkel, sot do të takohen në jug të Francës, një ditë para samitit kryesor të Bashkimit Evropian (BE) që mund të aprovojë një marrëveshje divorci me Britaninë e Madhe, transmeton Anadolu Agency (AA).

Të dy liderët së pari do të vizitojnë selinë e korporatës Airbus, si një simbol i bashkëpunimit industrial evropian, përpara se të zhvillojnë bisedime dypalëshe dhe një takim të kabinetit francezo-gjerman në qytetin Toulouse.

Macron dhe Merkel do të diskutojnë për Brexit-in derisa zyrtarët e BE-së dhe britanikët përpiqen të arrijnë marrëveshje përpara samitit të së enjtes në Bruksel, i fundit para daljes së planifikuar të Britanisë nga BE-ja më 31 tetor.

Zyra e presidentit Macron njoftoi se delegacionet franceze dhe gjermane, përfshirë ministrat kryesorë nga të dy qeveritë, do të diskutojnë gjithashtu tensionet e tregtisë globale, luftën kundër ndryshimit të klimës, projektet evropiane të mbrojtjes dhe si të mbrojnë rregullat e të drejtave të autorit të BE-së.