Lirohet shtetasja franceze që mbahej peng në Mali

Një shtetase franceze e mbajtur peng nga terroristët në Mali që nga viti 2016 është liruar, transmeton Anadolu Agency (AA).

Punëtorja humanitare 75-vjeçare, Sophie Petronin u rrëmbye nga një grup i armatosur në rajonin Gao verior të Malit në dhjetor të vitit 2016.

"Mund të themi me qetësi se ajo është e lirë edhe nëse autoritetet franceze nuk e kanë konfirmuar. Sebastien, kushëriri im është në atë vend në Bamako", i tha nipi i saj Lionel Granouillac kanalit francez të lajmeve BFMTV.

"Ky është rezultat i luftës së Sebastien për katër vjet, ai dha gjithçka që një djalë mund të jepte, duke sakrifikuar kohën e tij në jetën e tij personale dhe profesionale", shtoi ai.

Sipas informacionit të botuar në mediat lokale, disa dhjetëra terroristë u liruan po ashtu gjatë fundjavës në vendin e Afrikës Perëndimore.

Liria e Petronin mund të ishte negociuar në këmbim të këtyre lirimeve, sipas raporteve të medias.

Para rrëmbimit të saj në vitin 2016, Petronin ka drejtuar Shoqatën bamirëse zvicerane Aid to Gao që nga viti 2004.

Lirimi i saj ndodhi pasi junta ushtarake rrëzoi presidentin Ibrahim Boubacar Keita dhe premtoi të fitonte luftën kundër terrorizmit në Mali.

Pavarësisht nga prania e forcave paqeruajtëse franceze dhe të OKB-së në Mali, grupet e armatosura janë ende shumë aktive, veçanërisht në Malin verior.

Al-Kaeda në Magrebin Islam ka marrë përgjegjësinë për sulmet dhe rrëmbimet e fundit në Mali dhe Burkina Faso.