Avionët luftarakë izraelitë kryen sulme në lokacione të shumta në jug të Libanit, transmeton Anadolu.

Izraeli vazhdon sulmet e tij ndaj Libanit, pavarësisht marrëveshjes së armëpushimit të arritur më 27 nëntor 2024.

Sipas agjencisë zyrtare libaneze të lajmeve NNA, avionët luftarakë izraelitë shënjestruan zonën midis vendbanimeve Ansar dhe Zarariyeh në jug të Libanit si dhe Ukmata, rajonin Reyhan dhe zonën midis vendbanimeve Qifarwa dhe Izze.

Imazhet që qarkullojnë në mediat sociale tregojnë tym që ngrihet nga disa nga vendet e shënjestruara pas sulmit izraelit. Autoritetet libaneze nuk kanë lëshuar ende asnjë deklaratë në lidhje me sulmet ose ndonjë viktimë.

Megjithatë, ushtria izraelite pretendon se sulmet ajrore në jug të Libanit shënjestruan Hezbollahun.

Pretendohet se u goditën objektiva, përfshirë depot e armëve dhe infrastrukturën ushtarake dhe se një kamp stërvitjeje që i përkiste Forcës Ridwan të Hezbollahut u godit në njërën nga zonat e shënjestruara nga avionët luftarakë.

- Sulmet dhe pushtimi izraelit vazhdojnë, pavarësisht armëpushimit

Izraeli nisi sulme ndaj Libanit në tetor 2023, të cilat u përshkallëzua në luftë në shkallë të gjerë në shtator 2024. Më shumë se 4.000 njerëz u vranë në luftë dhe rreth 17.000 u plagosën.

Pavarësisht marrëveshjes së armëpushimit të arritur midis Libanit dhe Izraelit më 27 nëntor 2024, Izraeli thuhet se e ka shkelur armëpushimin mijëra herë.

Izraeli ende mban të pushtuara pesë kodrat që pushtoi në Liban pas 8 tetorit 2023 dhe ruan praninë e tij në disa zona që i ka mbajtur për dekada.

Ministria e Shëndetësisë njoftoi se 331 persona u vranë dhe 945 u plagosën në sulmet izraelite ndaj Libanit midis 27 nëntorit 2024 dhe 20 nëntorit 2025, në shkelje të armëpushimit.