Iran, protestat për Mahsa Aminin vazhdojnë në universitete

Protestat e nisura pas vdekjes së Mahsa Aminit në Iran kanë vazhduar në universitete të ndryshme të vendit, transmeton Anadolu Agency (AA).

Studentët e Universitetit të Shkencës dhe Teknologjisë në Teheran brohoritën slogane kundër qeverisë në protestën e tyre dhe e quajtën parkun "Jina Park" në kampus me emrin Mahsa Amini.

Studentët e Universitetit "Tarbiat Modares" reaguan duke thirrur parulla si "Teherani është bërë qendër paraburgimi, shtëpia juaj është bërë thertore" dhe "Betohem në gjakun e Mahsas se Irani do të çlirohet" së bashku me sloganin "Ne presim miqtë tanë, nuk po shkojmë askund, ne jemi këtu".

Sipas Agjencisë iraniane të Aktivistëve për të Drejtat e Njeriut, guvernatori i provincës Kurdestan njoftoi se shkollat ​​dhe universitetet ishin mbyllur për të mërkurën, duke përmendur "rastet në rritje të gripit".

Agjencia pretendoi se arsyeja kryesore pse shkollat ​​u mbyllën ishte dita e 40-të e vdekjes së Mahsa Aminit.

Sipas traditave iraniane, dita e 40-të e vdekjes konsiderohet një ditë e rëndësishme. Familja Amini njoftoi se nuk planifikojnë të organizojnë ndonjë ceremoni përkujtimore për të mërkurën.

Protestat në Iran

Vdekja e 22-vjeçares Mahsa Amini më 16 shtator, e cila u sëmur dhe u dërgua në spital pasi u ndalua nga patrullat e Irshadit, e njohur si "Policia e moralit” në Teheran, më 13 shtator, shkaktoi zemërim në vend.

Protestat, të cilat nisën pas funeralit të Aminit në vendlindjen e saj në Sakkez më 17 shtator, u përhapën në shumë qytete të vendit.

Televizioni shtetëror iranian njoftoi më 24 shtator se 41 persona, përfshirë forcat e sigurisë, humbën jetën në protesta.

Agjencia e Aktivistëve për të Drejtat e Njeriut në Iran (HRANA) në raportin e saj të publikuar sot pohoi se të paktën 244 persona e kanë humbur jetën, mes të cilëve 32 fëmijë dhe 26 roje të sigurisë.