Indi, 21 të vdekur nga reshjet e dendura

Njëzet e një persona kanë humbur jetën në 48 orët e fundit për shkak të shiut të dendur që ka përfshirë veriun e Indisë, transmeton Anadolu Agency (AA).

Autoritetet njoftuan se 18 persona kanë humbur jetën në aksidente të ndryshme të shkaktuara nga shiu i dendur në shtetin Uttar Pradesh.

“18 persona kanë vdekur për shkak të shiut të dendur në 48 orët e fundit”, tha zyrtari i policisë së shtetit Prabhu N Singh.

Ndërkaq, sipas raportimeve të mediave lokale, tre persona, përfshirë një fëmijë, kanë humbur jetën si pasojë e shembjes së një shtëpie në kryeqytetin New Delhi.

Për shkak të reshjeve të dendura, bllokime trafiku dhe grumbuj me ujë kanë ndodhur në shumë zona në New Delhi.