Policia në qytetin gjerman Hanau arrestoi sot një burrë pasi gati 50 automjete, kuti postare dhe fasada ndërtesash u vandalizuan me gjak në formën e svastikës, transmeton Anadolu.

I dyshuari ishte nën ndikimin e alkoolit në momentin e arrestimit, tha një zëdhënës i policisë për transmetuesin rajonal “Hessische Rundfunk”. Testi i frymëmarrjes ka treguar nivel alkooli në gjak prej 1,2 promilësh.

Policia tha se gjaku i përdorur në vandalizëm ka shumë gjasa të ketë qenë i vetë të dyshuarit. Ai ka qenë i plagosur kur oficerët e kanë ndaluar. Autoritetet thanë se një incident në vendin e punës mund të ketë nxitur veprimin, por nuk dhanë më shumë detaje.

Në Gjermani, shfaqja apo shpërndarja e simboleve naziste, si svastika, ndalohet me ligj, dhe shkelësit mund të përballen me gjoba ose me dënime me burg deri në tre vjet.

Kryebashkiaku i Hanaut, Claus Kaminsky, ka shprehur tronditje për incidentin.

“Sidomos në qytetin tonë, i cili u prek thellësisht nga sulmi racist i 19 shkurtit 2020, një akt i tillë shkakton shqetësim të thellë”, ka thënë Kaminsky. “Ajo që ndodhi këtu tejkalon çdo kufi të mirësjelljes dhe njerëzimit”, ka shtuar ai.

Kryebashkiaku po i referohej masakrës së ndodhur më 19 shkurt 2020 në Hanau, kur një ekstremist i së djathtës vrau nëntë persona me prejardhje imigrante, përpara se të vriste nënën e tij dhe më pas veten.