Gjendet kutia e dytë e zezë e avionit që u rrëzua në Indonezi

Është gjetur edhe kutia e dytë e zezë e avionit të udhëtarëve Sriwijaya Air që u rrëzua në Indonezi më 9 janar, raporton Anadolu Agency (AA).

Zëdhënësja e Ministrisë së Transportit, Adita Irawati, tha se një regjistrues zëri nga kabina u gjet gjatë një kontrolli në zonën ku u rrëzua avioni.

Megjithatë, ajo nuk specifikoi kur u gjet kutia e zezë dhe në çfarë gjendje ishte. Ajo shtoi se ministrja e Transportit, Buda Karya Sumadi dhe kreu i Komisionit Kombëtar për Sigurinë e Transportit (KNKT), Soerjanto Tjahjono, do të flasin për këtë çështje në më shumë detaje.

Kutia e parë e zezë, e cila përmbante të dhëna rreth fluturimit, u gjet më 12 janar, ndërsa raporti paraprak i botuar më 10 shkurt theksoi se shkaku i rrëzimit të avionit ishte çekuilibrimi në shtytjen e motorit.

Pesë pjesët që kontrollojnë funksionimin e motorit u dërguan në Shtetet e Bashkuara të Amerikës (SHBA) dhe Britaninë e Madhe më 2 shkurt për një hetim më të hollësishëm.

Një Boeing 737-500 në fluturimin "SJ182", i cili mbante 50 pasagjerë dhe 12 anëtarë të ekuipazhit, u rrëzua më 9 janar në zonën midis ishujve Laki dhe Lancang. Nga aksidenti nuk pati të mbijetuar.