Filipinet deportojnë mbi 300 kinezë për mashtrime
Byroja e Emigracionit tha se ka deportuar 312 shtetas kinezë që dyshohet se janë pjesë e një skeme të mashtrimit të investimeve telekomunikuese
Ankara
Autoritetet e emigracionit në Filipine dëbuan më shumë se 300 shtetas kinezë për të cilët raportohet se janë përfshirë në mashtrime të telekomunikacionit, transmeton Anadolu Agency (AA).
Byroja e Emigracionit (BI) tha se ka deportuar 312 shtetas kinezë që dyshohet se janë pjesë e një skeme të mashtrimit të investimeve telekomunikuese, bëri të ditur agjencia zyrtare e lajmeve të Filipineve.
Shefi i Inteligjencës së BI, Fortunato Manahan Jr. e quajti këtë operacion një sukses pas zbatimit të dëbimit masiv, thuhet në raport.
"Ata do të deportohen sot (e enjte) dhe ne jemi shumë mirënjohës për NCRPO (Zyra e Policisë së Rajonit Kombëtar të Kryeqytetit) që na ndihmoi në këtë operacion", u citua Manahan nga agjencia e lajmeve.
Në mesin e 312 shtetasve kinezë, 21 thuhet se janë të mitur të cilët janë dorëzuar në ambasadën kineze.
Sipas faqes së internetit të CNN Philippines, grupi i parë i 312 shtetasve kinezë tashmë janë larguar nga Filipinet me një fluturim të autorizuar të Kinës Lindore. "Grupet e radhës do të largohen nga vendi sot në mbrëmje", shtoi ai.
Të dëbuarit janë midis 512 punëtorëve të jashtëligjshëm të arrestuar nga autoritetet filipinase më 9 tetor dhe më pas u deportuan.
Të deportuarit përfshijnë shtetas nga Mianmari, Malajzia, Vietnami, Tajvani dhe Indonezia.
E përditshmja japoneze "Mainichi" raportoi se një grup prej 36 personave japonezë u arrestuan në Manila për një mashtrim të dyshuar telefonik.
Në disa bastisje që nga fillimi i vitit 2019, Byroja e Emigracionit në Filipine ka arrestuar rreth 1.400 punëtorë të huaj të dokumentuar në mënyrë jo të duhur, kryesisht shtetas kinezë.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.