Etiopia planifikon zhvendosjen e trupave ushtarake në kufirin me Sudanin

Etiopia ka njoftuar se do të zhvendosë trupat e saj në kufijtë e saj perëndimorë me Sudanin, transmeton Anadolu Agency (AA).

Zëdhënësi i Kryeministrisë së Etiopisë, Ridvan Hussain, për mediat tha se po zhvendosin "përparësinë e mbrojtjes nga rajoni Tigray në kufijtë perëndimorë".

Duke theksuar se ekziston një kërcënim kombëtar në kufirin perëndimor, Hussain deklaroi se njësitë ushtarake do të vendosen përgjatë kufirit perëndimor.

Hussain deklaroi se vendimi në fjalë ishte politik, jo ushtarak dhe se qeveria e kishte diskutuar këtë çështje gjerësisht.

Duke theksuar se stërvitjet e përbashkëta ushtarake mbahen në kufirin perëndimor, Hussain tha se, "Ne duhet të jemi të përgatitur për çdo eventualitet".

Ai tha se njësitë ushtarake janë tërhequr nga rajoni Tigray dhe do të dërgohen përsëri nëse është e nevojshme.

- Mosmarrëveshja e digës Hedasi

Etiopia, e cila furnizon 90 për qind të nevojave të saj për energji elektrike nga hidrocentralet, synon të mbyllë deficitin e energjisë dhe të shesë energji elektrike me Digën Hedasi, e cila do të jetë më e madhja në Afrikë.

Egjipti thotë se mbushja e digës pa një marrëveshje kërcënon rrjedhën e lumit, i cili përbën gati të gjithë ujin që përdoret për të pirë dhe për bujqësi.

Nga ana tjetër, Sudani e konsideron mbushjen e digës pa një marrëveshje trepalëshe, e cila ka qenë objekt diskutimi për 10 vjet, si një kërcënim për sigurinë e tij kombëtare.

Pala sudaneze dhe egjiptiane insistojnë në nënshkrimin e marrëveshjes ligjore detyruese që gjithashtu ofron zgjidhje për mosmarrëveshjet e mundshme në të ardhmen.