Etiopi, gjendet i vdekur inxhinieri i projektit 4.8 miliardë dollarëshe

ADDIS ABABA (AA) - Udhëheqësi i projektit të Digës së Rilindjes Etiopiane prej 4.8 miliardë dollarësh, një digë hidroelektrike në Nil, sot u gjet i vdekur në makinën e tij, duke nxitur dyshime dhe protesta në vend, raporton Anadolu Agency (AA).

Ekipet mjeko-ligjore po hetojnë lokacionin ku inxhinieri Simegnew Bekele vdiq, i njohur si sheshi Meskel i kryeqytetit etiopian, Addis Ababa.

Bekele ka qenë menaxher i projektit për digën që kur nisi ndërtimin e saj në vitin 2011.

Qindra protestues të zemëruar me vdekjen e inxhinierit, shumica e të cilëve dyshojnë të jetë vrasje, u tubuan para televizionit shtetëror ETV duke bërë thirrje për drejtësi.

Në vendngjarje, gjurmët e gjakut ishin të dukshme brenda makinës, ku Bekele u gjet në ulësen e shoferit.

Lajmi tronditi opinionin ndërsa shumë etiopianë mbanin zi për vdekjen e tij. Ndërkohë mediat sociale u vërshuan me komente dhe spekulime.

Presidenti etiopian, Mulatu Teshome, bëri një deklaratë duke e quajtur inxhinierin hero.