Dy shqiptarë të vdekur nga shembja e urës në Itali

TIRANË (AA) - Në mesin e personave që humbën jetën nga shembja e urës Morandi në Gjenova të Italisë janë edhe dy shqiptarë, transmeton Anadolu Agency (AA).

Ministri për Evropën dhe Punët e Jashtme i Republikës së Shqipërisë, Ditmir Bushati, në një reagim në rrjetet sociale për tragjedinë në Itali shkruan se është një lajm i dhimbshëm humbja e jetës së dy të rinjve shqiptarë, Marjus Djerri dhe Admir Bokrina.

“Në këto momente të trishtuara u shpreh ngushëllimet e mia më të sinqerta familjarëve dhe të afërmve të tyre. Ambasada shqiptare në Itali është në gatishmëri të plotë dhe u ofron mbështetjen dhe ndihmën e shtetit shqiptar familjarëve në këtë çast të rëndë për ta”, shkruan ministri Bushati.

Në lidhje me ngjarjen, presidenti i Shqipërisë, Ilir Meta dhe kryetari i Kuvendit të Shqipërisë, Gramoz Ruçi, u kanë dërguar mesazhe ngushëllimi autoriteteve italiane.

Kujtojmë se së paku 37 persona kanë humbur jetën gjatë shembjes së urës Morandi në autostradën A10 në Gjenova të Italisë.