Cikloni Garance godet Ishullin Reunion të Francës

Cikloni Garance goditi sot territorin francez të ishullit Reunion që ndodhet në Oqeanit Indian, duke rezultuar në të paktën tre viktima dhe dëm të madh infrastrukturor, raporton Anadolu.

Prefekti Patrice Latron i ishullit Reunion, në një deklaratë njoftoi se janë shënuar tre viktimat, duke shtuar se rreth 182 mijë njerëz mbetën pa energji elektrike, 171 mijë njerëz mbetën pa ujë të pastër dhe 134 mijë persona nuk kishin internet. Ai tha se ësht shpallur alarmi i kuq dhe do të vazhdojë deri të shtunën.

Kryeministri francez Francois Bayrou gjithashtu konfirmoi numrin e të vdekurve në llogarinë e tij në X, duke thënë se cikloni është ende duke kërcënuar ishullin.

"Unë bëj thirrje për respektimin e udhëzimeve të autoriteteve vendore. Mirënjohje për shërbimet shtetërore që po na ndihmojnë të kalojmë këtë përvojë të hidhur", tha ai.

Erërat e forta të ciklonit dhe reshjet e dendura të shiut çuan në ndërprerje të gjera të energjisë elektrike, ndërprerje të furnizimit me ujë dhe dëmtime të mëdha pronësore në të gjithë ishullin.

Sipas autoriteteve, stuhia arriti erëra maksimale që kalonin 200 kilometra në orë, duke shkulur pemë, duke hequr çatitë dhe duke shkaktuar përmbytje të rënda në rajone të ndryshme.

Cikloni bëri që autoritetet të lëshonin një alarm të nivelit më të lartë, duke i kufizuar banorët në shtëpitë e tyre dhe duke pezulluar të gjitha aktivitetet jo thelbësore.

Shërbimet e urgjencës janë mobilizuar për të vlerësuar dëmin, për të rivendosur shërbimet thelbësore dhe për të ofruar ndihmë për të prekurit.

Shpërndarja e furnizimeve emergjente është planifikuar të fillojë nesër për të ndihmuar në strehimin e përkohshëm dhe në riparime.