Betohet Schallenberg, Austria me kancelar të ri

Austria sot është bërë me kancelar të ri, dy ditë pasi Sebastian Kurz dha dorëheqjen për shkak të akuzave për korrupsion, transmeton Anadolu Agency (AA).

Ish-ministri i Jashtëm austriak Alexander Schallenberg u betua sot si kancelar në një ceremoni në zyrën e presidentit Alexander Van der Bellen.

Michael Linhart u bë ministri i ri i Punëve të Jashtme të Austrisë.

Kurz, 35-vjeçar, të shtunën dha dorëheqjen për të zbutur krizën politike të shkaktuar nga njoftimi i prokurorisë se kancelari është një nga objektivat e hetimit të dyshuar mbi ryshfet dhe shkeljen e besimit.

Kurz dhe bashkëpunëtorët e tij të ngushtë akuzohen se janë përpjekur të sigurojnë ngritje në krye të partisë së tyre dhe shtetit me ndihmën e sondazheve të manipuluara dhe raporteve miqësore të mediave, të financuara nga paratë publike.

Edhe pse po largohet nga posti i kancelarit, ai ruan rolin e drejtuesit të Partisë Popullore të Austrisë.

Van der Bellen vlerësoi përvojën e dy udhëheqësve të rinj në përfaqësimin e Austrisë jashtë vendit në të kaluarën, por gjithashtu theksoi përgjegjësinë që kanë në rikthimin e besimit të popullit austriak në qeveri.

"Ne të gjithë presim që qeveria të kthehet në punë dhe së bashku të ecë përpara", tha Van der Bellen.

Schallenberg ka qenë ministër i Jashtëm që nga viti 2019, ndërsa Linhart ishte ambasador i Austrisë në Francë derisa u ftua në Vjenë gjatë fundjavës për të marrë detyrën si kreu i diplomacisë shtetërore.