Zelenskyy: Situata në rajonin e Donetskut është e vështirë

Presidenti ukrainas, Volodymyr Zelenskyy, deklaroi se situata është e vështirë në rajonin e Donetskut të vendit të tij, por ushtarët vazhdojnë të mbrojnë pozicionet e tyre, transmeton Anadolu.

Në deklaratën në llogarinë e tij në rrjetet sociale, Zelenskyy deklaroi se ka marrë një raport nga Shefi i Shtabit të Përgjithshëm, Oleksandr Sirskiy, për situatën në vijën e frontit.

Duke theksuar se situata është e vështirë në rajonin e Donetskut, Zelenskyy tha: "Megjithatë, brigadat tona mbrojnë pozicionet dhe bëjnë gjithçka që është e mundur për të shkatërruar pushtuesin".

Lidhur me operacionet e Rusisë në rajonin e Kurskut, Zelenskyy tha: "Ne po përmbushim qëllimet tona. Zona tampon në territorin rus mbron Ukrainën nga përpjekjet e Rusisë për të përhapur luftën në lindje të vendit tonë dhe siguron që Rusia të pësojë humbje të konsiderueshme".

- "Sipas inteligjencës, Rusia do të vendosë ushtarët e parë të Koresë së Veriut në zonat luftarake më 27-28 tetor"

Duke thënë se Sirskiy "ka dhënë informacion se Rusia po sjell ushtarë nga Koreja e Veriut", Zelenskyy tha: "Sipas inteligjencës, Rusia do të vendosë ushtarët e parë të Koresë së Veriut në zonat luftarake më 27-28 tetor. Ndryshe nga dezinformatat që qarkullojnë në Kazan këto ditë, ky është hapi i qartë i Rusisë për të përshkallëzuar tensionet".

Zelenskyy tha se ishte e nevojshme të parandalohej përfshirja e Koresë së Veriut në konflikt.

Në deklaratën e bërë nga Ministria e Mbrojtjes e Ukrainës më 24 tetor, pretendohet se njësitë e para ushtarake të Koresë së Veriut u sollën në rajonin Kursk të Rusisë.