Kurti: Borrell iu përshtat më shumë qëllimit të Serbisë

Kryeministri i Kosovës, Albin Kurti ka thënë se Përfaqësuesi i Lartë i Bashkimit Evropian (BE) për Politikë të Jashtme dhe Siguri, Josep Borrell, në takimin trilateral të 21 nëntorit, Kosovë-Serbi-BE, i është përshtatur më shumë qëllimit të Serbisë, raporton Anadolu Agency (AA).

Para fillimit të pikave të rendit të ditës të mbledhjes së Qeverisë së Kosovës, Kurti tha se ndërmjetësit e BE-së kanë hequr nga agjenda e takimit trepalësh për çështjen që me urgjencë të kishte një përqendrim në propozimin evropian për normalizimin e marrëdhënieve Kosovë-Serbi.

Kurti tha se në ftesën e Borrellit për takim ishin katër paragrafë, në të cilin i pari dhe i treti ishte për përqendrim në propozimin e BE-së, të përkrahur nga Gjermania dhe Franca, për normalizim marrëdhëniesh Kosovë-Serbi para marsit 2023.

"Përfaqësuesi i Lartë i BE-së për Politikë të Jashtme dhe Sigurisë, fatkeqësisht e ndryshoi premisën e negocimit të ditës së hënë. Në kundërshtim me parimin e propozuar nga vetë ai, filloi të insistojë në një marrëveshje që insiston vetëm masat e mirëbesimit: pezullimin e gjobave për targa. Qëllimi i madh u hoq nga agjenda, nevoja urgjente për propozimin evropian me mbështetje franko-gjermane u zhduk nga tavolina duke iu përshtatur qëllimit të Serbisë, presidenti i së cilës kishte ardhur në Bruksel jo për propozimin e BE-së, por për targat", tha Kurti.

Ai potencoi se në Bruksel shkon për marrëveshjen finale dhe normalizimin e plotë të marrëdhënieve me njohjen reciproke në qendër.

"Ky duhet të jetë qëllimi dhe ky është kuptimi. Ndërkaq, autorët e propozimit të BE-së e braktisën propozimin e tyre, prandaj edhe takimi përfundoi", theksoi Kurti.

Kurti tha se sikurse në takimin e 18 gushtit, ai është i fundit që ka lëshuar ndërtesën e BE-së "sepse gjithmonë ekziston mundësia edhe për një përpjekje të fundit".

Kryeministri kosovar tha se kjo përpjekje ka ekzistuar pasi emisari i BE-së për dialogun Kosovë-Serbi, Miroslav Lajçak ka ardhur në vendin ku po qëndronte ai me një tekst ku përfshihej edhe propozimi i BE-së, por më pas u njoftua se presidenti serb nuk e ka pranuar këtë tekst, ndërkohë që, në këtë kohë Borrell ndodhej tashmë në konferencë për media duke kritikuar Kosovën.

Më tej, Kurti ka thënë se me vendimin për targa Kosova është treguar zemërgjerë dhe ky vendim nuk mund të jetë objekt negocimi “por, është vendim i Qeverisë së Kosovës”.

"Asnjë polic i Kosovës nuk kënaqet derisa gjobitë. Gjobitja është detyrë, jo dëshirë e individit, por obligim e detyrë sipas ligjit të shtetit tonë", tha Kurti.

Ai tha se komuniteti serb në Kosovë është më i mbrojturi dhe më i privilegjuari në Kushtetutë. Sipas tij, të drejtat për pakica, siç ofron Kushtetuta e Kosovës, nuk ofrohen as në kushtetuta të shumë shteteve të avancuara të BE-së.

Më 21 nëntor në Bruksel, kryeministri Albin Kurti zhvilloi bisedime me presidentin serb Aleksandër Vuçiq me ndërmjetësimin e Borrell dhe Lajçak, por pas më shumë se 5 orësh bisedime nuk u arrit marrëveshje për çështjen e targave ilegale të automjeteve që ende qarkullojnë në Kosovë.

Pas këtij takimi, Borrell kishte thënë se ka qenë Kosova e cila në këto bisedime nuk pranoi propozimet e BE-së për çështjen e targave, ndryshe nga Serbia.