Kosovë, arrijnë mbi 100 mijë doza të vaksinës Pfizer

Autoritetet shëndetësore të Kosovës kanë pranuar sot 100.620 doza të vaksinës Pfizer nëpërmjet aleancës Gavi të programit COVAX, transmeton Anadolu Agency (AA).

Siç ka njoftuar Ministria e Shëndetësisë në Kosovë, që nga arritja e 24 mijë dozave të para të vaksinës në fund të muajit mars, të cilat u pasuan nga 38 mijë e 400 doza të tjera që arritën dy javë më parë, dhe 15 mijë doza që janë dorëzuar deri më tani nga Mekanizmi i Bashkimit Evropian për Ballkanin Perëndimor, ekipet e vaksinimit në gjithë vendin kanë vaksinuar grupet prioritare dhe qytetarët me sëmundje kronike siç përcaktohet në Planin shtetëror të Vaksinimit.

“Vaksinimi është mjeti thelbësor dhe shpresa më e mirë për t'i dhënë fund pandemisë COVID-19. 100.620 vaksinat e siguruara përmes COVAX-it janë një hap i rëndësishëm për të ndjekur planin e vaksinimit me ritme të shpejta dhe pandërprerë, sipas të gjithë parametrave të sigurisë dhe cilësisë”, ka shkruar Ministria e Shëndetësisë.

Tutje, ministria ka tërhequr vëmendjen se pandemia COVID-19 nuk ka mbaruar ende, ndërsa ka bërë thirrje të vazhdohet me masat e parandalimit të përhapjes së virusit: mbajtjen e maskave, distancën fizike dhe higjienën.