Agjencia e Menaxhimit Emergjent (AME) ka bërë të ditur se si pasojë e temperaturave të larta dhe erërave të forta, situata me zjarret në territorin e Kosovës është rënduar në periudhën raportuese, transmeton Anadolu.

Sipas AME-së, si pasojë, situata e përcjellë nga Qendra Operative e Agjencisë, rezulton me gjithsej 29 vatra të zjarreve në 8 orët e fundit, ku 17 nga ato janë lokalizuar, derisa 12 vatra zjarri mbeten aktive.

Një zjarr mjaft i madh është raportuar nga fshati Lubizhdë i Prizrenit ditën e sotme, ku më pas shiu ndihmoi zjarrfikësit në procesin e shuarjes së tij.

AME-ja apeloi te qytetarët që të mbajnë kujdesin e shtuar, të mos ndezin zjarre në ambiente te jashtme dhe të lajmërojnë menjëherë zjarrëvëniet në institucionet shtetërore.

AME-ja tha se ajo bashkë me Njësitë e Zjarrëfikjes dhe Shpëtimit, si dhe Policinë e Kosovës, janë në gatishmëri dhe reagim në çdo kohë.