Sibel Vezaj
02 Shkurt 2017•Përditësim: 03 Shkurt 2017
PRISHTINË (AA)-Kryeministri i Republikës së Kosovës, Isa Mustafa sot priti në takim kryeministrin e Shqipërisë, Edi Rama, raporton Anadolu Agency (AA).
Në një njoftim nga Zyra e Kryeministrit bëhet e ditur se gjatë takimit, ku ishin të pranishëm edhe zëvendëskryeministrat Hajredin Kuçi dhe Ramiz Kelmendi, u bisedua për forcimin e bashkëpunimit ndërmjet dy shteteve si dhe për proceset zhvillimore në Kosovë, Shqipëri dhe rajon.
Me këtë rast, kryeministri Mustafa, pasi e njoftoi kryeministrin Rama për progresin në Kosovë, shprehu përkushtimin e Qeverisë së Kosovës për zgjerimin e shkëmbimeve dhe të raporteve ndërmjet dy shteteve.
Sipas njoftimit, kryeministri Rama vlerësoi arrtjet në Kosovë, duke shprehur vullnetin e Qeverisë së Shqipërisë për thellimin e bashkëpunimit bilateral me Kosovën.
Gjatë takimit, u bisedua edhe për proceset integruese euroatlantike dhe për angazhimin e Kosovës dhe të Shqipërisë në këtë rrugë.
Rama sot zhvilloi takime të ndara edhe me zyrtarët e partisë opozitare të Kosovës, Aleanca për Ardhmërinë e Kosovës (AAK) dhe kryetarin e Komunës së Prishtinës, Shpend Ahmeti.
