Merve Gül Aydoğan Ağlarcı
08 Август 2022•Ажурирај: 09 Август 2022
АНКАРА (АА) - Турскиот министер за надворешни работи, Мевлут Чавушоглу, денес изјави дека надворешната политика на Туркије е претприемничка и хуманитарна, а не догматска или непринципиелна, што придонесе да се ублажи заканата од глобалната криза со храна, јавува Агенција Анадолија (АА).
Говорејќи на 13-та Конференција на амбасадорите во турскиот главен град Анкара, Чавушоглу рече дека кризата во Украина „уште еднаш ја покажала вредноста на Туркије“.
Анкара очекува нејзините сојузници да бидат „попријателски, поактивни и помалку критични и да преземат одговорност“, додаде тој.
Чавушоглу рече дека прекуграничните операции на Туркије напредуваат со ефикасна дипломатска поддршка, нагласувајќи дека тие се од големо значење за територијалниот интегритет на Сирија и Ирак.
„Борбата против тероризмот е црвена линија за Туркије“, изјави Чавушоглу.
Тој рече дека Анкара очекува ирачките власти да преземат конкретна акција против терористичката организација ПКК.
„Додека не се случи тоа, Туркије ќе продолжи да презема мерки за заштита на својата национална безбедност“, нагласи турскиот министер.
„Туркије се надева дека нејзината чувствителност во борбата против тероризмот е добро разбрана од светот“, додаде Чавушоглу.
Тој, исто така, ги критикуваше САД дека не преземаат „задоволителни чекори“ против терористичките организации ПКК/ПЈД/ЈПГ и ФЕТО, како и за едностраните санкции против Туркије.
Туркије долго време ја критикува поддршката на Вашингтон за терористите на ЈПГ/ПКК.
Додека САД тврдат дека се борат против терористичката организација ДЕАШ со помош на својот сојузник ЈПГ/ПКК, Туркије вели дека користењето на една терористичка организација за спротивставување на друга, нема смисла.
Во врска со целта на Туркије за членство во Европската Унија (ЕУ), Чавушоглу ја потврди посветеноста на Анкара и рече дека земјата „ќе ја продолжи конструктивната политика за подобрување на соработката и дијалогот на сите полиња“.
„Туркије е Европа“, рече тој, нагласувајќи ја одговорноста на Анкара во обезбедувањето на безбедноста на Европа.
Осврнувајќи се на ситуацијата во Источниот Медитеран и Егејот, Чавушоглу рече дека Туркије сака меѓусебно поврзаните прашања да се решат „холистички и сеопфатно во согласност со меѓународното право“.
„Грција, сепак, нема волја да ги реши (овие) прашања“, рече тој.
Говорејќи за неодамнешното зголемување на тензиите меѓу Ерменија и Азербејџан, тој повтори дека Туркије „уште еднаш ја предупредува Ерменија да не се впушта во нови провокации“.
Кога Азербејџан ја ослободи територијата во Карабах, што беше окупирана од Ерменија речиси три децении, за време на конфликтот во есента 2020 година, Чавушоглу рече дека Туркије се залага за правда и ја поддржува праведната и вистинита страна.
Турскиот шеф на дипломатијата, исто така, го осуди новиот бран израелски напади врз Газа, велејќи дека не може да постои оправдување за убивањето невини луѓе, особено на 5-годишно дете.
