Handan Kazancı
25 Мај 2020•Ажурирај: 26 Мај 2020
АНКАРА (АА) - Солидарноста со Африка е поважна од кога и да е претходно додека светот се бори против новиот вид коронавирус, порача денес турскиот министер за надворешни работи, Мевлут Чавушоглу, одбележувајќи го Денот на Африка, годишнината од основањето на Африканската Унија, пренесува Агенција Анадолија (АА).
„Невидените услови што ги предизвика пандемијата на Ковид-19 во светот ја прават солидарноста, што е симболизирана со Денот на Африка, уште позначајна оваа година“, рече Чавушоглу, додавајќи:
„Напредокот што Африка го постигна во последните години на многу полиња и нашето партнерство во развој со континентот ни овозможува да гледаме кон иднината со надеж, и покрај постоечките сериозни предизвици. Заедно со нашите јавни институции, невладини организации и приватниот сектор, дадовме приоритет на развојот на нашата соработка со африканскиот континент.“
Секоја година на 25 мај се одбележува Денот на Африка, денот кога во 1963 година е основана Африканската Унија.
Турција има за цел „дополнително да ги зајакне односите со Африка врз основа на разбирање и заемно почитување“, истакна Чавушоглу. Тој исто така ја нагласи одлучноста на Турција да ги доведе односите со Африка на највисоко можно ниво.
„Бројот на турските амбасади во Африка е зголемен од 12 во 2002 година на 42“, рече Чавушоглу и додаде дека во сличен сооднос е зголемен и бројот на африкански амбасади во Анкара, од десет во 2008 година на сегашните 36.
„Нашиот билатерален обем на трговска размена порасна за шестпати во последните 18 години“, рече Чавушоглу.
- Трет самит за партнерство на Африка и Турција -
„Интересот на Турција за Африка и чувството на турскиот народ за пријателство кон африканскиот континент, со кој Турција има историски и човечки врски, не е новост“, нагласи Чавушоглу.
„Бидејќи нашата земја стана стратешки партнер на Африканската Унија и со првиот Самит за партнерство Африка-Турција во 2008 година во Истанбул, Турција и африканските земји јасно ја поставија својата заемна волја да ги зајакнат своите односи до понапредна фаза“, рече турскиот шеф на дипломатијата и додаде дека Турција сака третиот самит за партнерство Африка-Турција да се одржи што е можно поскоро:
„Во октомври 2020 година планираме да го одржиме и третиот Турско-африкански економски и бизнис-форум, кој веќе се одржа во Истанбул во 2016 и 2018 година и кој постигна успешни резултати.“
Чавушоглу се осврна и на глобалната пандемија на новиот коронавирус Ковид-19.
„Африканските земји ги презедоа потребните мерки навремено благодарение на нивното искуство во борбата против епидемиските болести. Бројот на случаите на заразени и на смртните случаи на континентот во моментов е релативно мал. Искрено се надеваме дека овој тренд ќе продолжи и дека болеста ќе биде искоренета од тој континент“, нагласи Чавушоглу.
- Турската помош за африканските држави -
Бројот на случаи на Ковид-19 во Африка вчера се искачи на речиси 107.500, откако беа потврдени околу 3.500 нови случаи во последните 24 часа.
Откога се појави за првпат во кинескиот град Вухан во декември минатата година, новиот коронавирус се прошири во најмалку 188 земји во светот. Во моментов најтешко се погодени Соединетите Американски Држави (САД), Русија, Бразил и уште неколку други европски земји.
„Турција е меѓу државите кои ја надминаа првата фаза од пандемијата и во моментов може да го задржи бројот на нови случаи под капацитетот за лекување. Откако успеа да пружи помош во опрема на некои земји на почетокот на епидемијата, Турција има за цел да го зголеми својот капацитет на помош во наредниот период. Како земја која пружи рака за помош на најголем број земји по САД и Кина, Турција се обидува што поскоро да одговори на ваквите барања од нашите пријателски африкански земји“, порача Чавушоглу.
Тој додаде дека периодот по коронавирусот треба да биде „оној што бара поголема меѓународна соработка отколку претходно, а никако помалку“.
„Турција е подготвена да го направи она што е потребно во тој поглед заедно со останатите земји“, истакна Чавушоглу.
Тој потсети на „духот од 1963 година“, нагласувајќи дека африканскиот континент исто така во единство ќе го надмине овој предизвик.
„Искрено верувам дека Африка ќе придонесе не само за благосостојбата на сопствениот народ, туку и на светскиот поредок во наредните години, и дека турско-африканското партнерство ќе биде прикажано како пример во новиот постпандемиски светски поредок, во кој солидарноста ќе стане поважна“, порача Чавушоглу.
