Турција повика на смирување на тензиите во Либија и продолжување на политичките процеси

АНКАРА / ТРИПОЛИ (АА) - Властите на Република Турција изразија длабока загриженост поради ескалација на тензиите во Либија, каде што се водат жестоки оружени судири меѓу ривалските сили околу Триполи, јавува Anadolu Agency (AA).

„Воените судири и операции го загрозуваат цивилното население и доведуваат до нова криза, но, исто така, и ги блокираат политичките процеси кои се водат под покровителство на ОН“, се наведува во соопштението на турското Министерство за надворешни работи.

Во соопштението се повикуваат сите страни да ги релаксираат тензиите и да пружат поддршка за продолжувањето на мировниот политички процес.

Либискиот воен командант Халифа Хафтар во четвртокот им нареди на силите лојални на неговиот табор да тргнат кон Триполи, главниот град на Либија, кој е под контрола на Владата на национално единство, поддржана од Обединетите нации.

Портпаролот на либиското Министерство за здравство во Триполи, Емин Мухамед Ал Хашими, за АА истакна дека досега во судирите загинале најмалку 21, а ранети се 27 лица, меѓу кои и голем број цивили.

Ахмед Месмари, портпаролот на Националната армија на Либија, на командантот Хафтар, синоќа предупреди дека сите авиони што летаат во тој регион ќе бидат соборени.

Тој не ја откри моменталната ситуација на теренот, а претходно беше соопштено дека силите на Хафтар ја презеле контролата врз аеродромот и неколку периферни места во Триполи.

Либија е средиште на длабока политичка и безбедносна криза уште од 2011 година, кога беше убиен Муамер Гадафи. Оттогаш, на власт се паралелни влади со седиште во Триполи и Тобрук, односно Ал Бајда, кои имаат одделни парламенти и вооружени сили. Хафтар е на чело на структурите во Тобрук.