Турција: Извештајот на САД за тероризмот е нецелосен и пристрасен

АНКАРА / ИСТАНБУЛ

Турција денеска го отфрли новиот извештај на американскиот Стејт департмент за тероризмот, велејќи дека тој не ја проценил правилно борбата на Анкара против терористичките организации, јавува Агенција Анадолија (АА).

Министерството за надворешни работи соопшти дека извештајот на САД за тероризмот во 2020 година, објавен во четвртокот, ја поткопува борбата на Турција против терористичките организации како што се ПКК, ДХКП-Џ и ДЕАШ, како и нејзиниот придонес во меѓународните напори за борба против тероризмот.

Во врска со наводите во извештајот дека турските антитерористички напори ги ограничуваат правата и слободите, во соопштението се вели дека тие се „неосновани и неприфатливи“.

„Турција ја чува тенката линија меѓу безбедноста и слободата без да прави разлика меѓу терористичките организации“, се додава во соопштението.

„Во делот на извештајот за Сирија се споменува дека терористичките организации поврзани со ПКК се примарна грижа на Турција. Ова само по себе е признание дека терористичката организација ЈПГ/ПЈД со седиште во Сирија – која исто така ја користи ознаката СДФ – и ПКК се две страни на иста монета“, се додава во соопштението на Министерството.

Во својата над 30-годишна терористичка кампања против Турција, ПКК, која се наоѓа на листата терористички организации во Турција, Соединетите Американски Држави (САД) и Европската Унија (ЕУ), одговорна е за смртта на околу 40.000 луѓе, меѓу кои и деца и жени. ЈПГ е сириски огранок на ПКК.

„САД добро знаат дека ЈПГ/СДФ, кои тие ги поддржуваат под маската на борбата против ДЕАШ, е под контрола на ПКК“, соопшти Министерството.

Турција долго време се противи на американската поддршка за ЈПГ, наводно за борба против ДЕАШ, велејќи дека користењето на една терористичка организација за борба против друга нема смисла.

„Па така, неприфатливо е во извештајот да не бидат вклучени терористичките напади на групите поврзани со ПКК насочени кон цивилите, вклучувајќи и напади врз болници во Сирија, кои резултираа со смрт на повеќе од 120 невини луѓе во текот на изминатата година“, се вели во соопштението.

„Пропустот во извештајот за ослободување од страна на терористичката организација на странските борци (ДЕАШ) во замена за поткуп е обид да се прикријат вистинските намери на ЈПГ/СДФ“, се вели во соопштението.

- „Пристрасен“ третман кон терористичката закана на ФЕТО

Покрај тоа, третманот на извештајот за легитимната борба на Турција против терористичката организација ФЕТО е пристрасен, не земајќи го предвид крвавиот обид за пуч во 2016 година што го организираше и нејзината историја на криминални активности.

„Со конкретни докази и судски одлуки е докажано дека ФЕТО е безмилосна терористичка организација и криминална мрежа“, се вели во соопштението на Министерството.

„ФЕТО е закана не само за нашата земја, туку и за безбедноста и стабилноста на секоја земја во која е активна. Нашето очекување од САД е да го прекинат присуството и активностите на ФЕТО во нивната земја без понатамошно одлагање, да не обезбедуваат засолниште за членовите на ФЕТО, вклучително и за водачот на ФЕТО, и да соработуваат со Турција на ова поле.

Терористичката организација ФЕТО и нејзиниот лидер Фетула Ѓулен, кој се наоѓа во Соединетите Американски Држави (САД), го организираа неуспешниот пуч на 15 јули 2016 година, во кој животот го загубија 251 лице, а 2.734 беа повредени.

ФЕТО стои и зад долготрајната кампања за уривање на државниот поредок во Турција преку инфилтрирање на своите приврзаници во турските институции, особено во војската, полицијата и судството.

„Турција очекува конзистентен, решителен и ефективен пристап од САД и нивните сојузници во борбата против тероризмот“, се заклучува во соопштението.