АНТАЛИЈА (АА) - Турција извезе околу 80 милиони цвеќиња во 35 земји, главно, во Холандија и Велика Британија, по повод 8 Март - Меѓународниот ден на жената.

Во стаклениците во југозападниот турски град Анталија владее вистински метеж поради интензивното производство на свежи цвеќиња за оваа пригода.

Свежите цветови, меѓу кои доминираат каранфилите и зумбулите, често се сечат со стеблото и листот и внимателно се пакуваат во магацините во Анталија пред да бидат пратени низ светот.

Исмаил Јилмаз, претседател на Здружението на извозници на украсни растенија и производи, за Анадолу изјави дека испораките за Меѓународниот ден на жената се ближат кон крајот, а во стаклениците се подготвуваат последните нарачки.

Јилмаз изјави дека турскиот сектор за режани цвеќиња оваа година е поактивен во споредба со минатата година, со зголемување на нарачките за 15 проценти.

„Минатата година за Меѓународниот ден на жената извезовме цвеќиња во вредност од 9 милиони долари, но годинава природата и трудот нè наградија со промет од речиси 12 милиони долари“, вели Јилмаз.

Според него, Холандија останува најзначаен пазар за Турција, а потоа е Велика Британија. Турските цветови го наоѓаат својот пат и низ воените виори, стигнувајќи дури до Украина и Русија, а потоа и Германија, Романија и Бугарија.

Јилмаз додаде дека европскиот пазар оваа година најмногу барал цветови во пастелни бои, иако имало и значителни нарачки за црвени и бели.

Секторот за одгледување цвеќиња во Турција опфаќа површина од околу 15.000 хектари и обезбедува приход за 100.000 работници директно и 300.000 работници индиректно.

Особено значаен е фактот дека жените сочинуваат неверојатни 80 отсто од работната сила во цветниот сектор.