Туркије ја осуди Шведска што дозволи демонстрации на поддржувачите на терористичката организација ПКК во Стокхолм

АНКАРА (АА) - Туркије ја осуди Шведска што ги дозволи демонстрациите на поддржувачите на терористичката организација ПКК во главниот град Стокхолм, јавува Агенција Анадолија (АА).

„Најостро ја осудуваме дозволата за групите поврзани со терористичката организација ПКК да спроведуваат антитурска пропаганда во центарот на градот, веднаш откако во главниот град Стокхолм беше дозволен подлиот напад врз нашата света книга Куранот“, се наведува во соопштението на турското Министерство за надворешни работи.

Министерството го нарече чинот „очигледно кршење“ на трипартитниот договор потпишан минатото лето од Туркије, Финска и Шведска.

Турското Министерство за надворешни работи ги повика шведските власти да „преземат конкретни и ефикасни чекори во борбата против тероризмот“, во согласност со своите обврски од договорот.

Вчера, поддржувачите на терористичката организација ЈПГ/ПКК организираа провокативни демонстрации во главниот град на Шведска.

Минатата недела Анкара ја повика Шведска да преземе чекори против терористичките организации по сличните демонстрации на поддржувачите на ЈПГ/ПКК во Стокхолм.

Во својата над 35-годишна терористичка кампања против Туркије, ПКК, која е означена како терористичка организација од САД, ЕУ и Туркије, е одговорна за смртта на над 40.000 луѓе, меѓу кои и деца и жени. ЈПГ е сириски огранок на ПКК.

Во јуни минатата година Туркије, Шведска и Финска потпишаа меморандум на самитот на НАТО за решавање на легитимните безбедносни грижи на Анкара, отворајќи го патот за конечно членство на Шведска и Финска во НАТО.

Турските власти, вклучително и претседателот Реџеп Таип Ердоган, предупредија дека земјата нема да го одобри членството на Шведска и Финска во НАТО додека не се спроведе меморандумот.

За да може една држава да влезе во НАТО, потребна е едногласна согласност од сите 30 земји сојузнички.