Туркије издаде предупредување за своите граѓани кои патуваат во САД и Европа поради зголеменото насилство

АНКАРА (АА) - Министерството за надворешни работи на Туркије издаде предупредување за своите граѓани кои патуваат или престојуваат во САД поради зголемениот број расистички и ксенофобични напади, известува Агенција Анадолија (АА).

Турското МНР објави дека е забележано зголемување на насилството и поголем број расистички и ксенофобични напади кон странците во САД.

Протести се одржуваат низ САД откако Тајр Николс почина откако бил изложен на полициско насилство во Мемфис, град во американската сојузна држава Тенеси, се наведува во соопштението на турското МНР.

„Имајќи ги предвид протестите, нашите граѓани што живеат во САД или планираат да патуваат во оваа држава, треба да бидат внимателни, да ги избегнуваат подрачјата во кои се спроведуваат демонстрации, да се однесуваат смирено пред можните ксенофобични и расистички вознемирувања и напади и да пријават на локалните безбедносни сили, а исто така и внимателно да ги следат локалните медиуми и радиодифузните организации“, се вели во соопштението на Министерството.

Министерството за надворешни работи на Туркије во саботата издаде и предупредување за своите граѓани кои патуваат во европските земји да бидат внимателни поради зголемувањето на антиисламските, ксенофобични и расистички акции, како и поради пропагандните демонстрации против Туркије од страна на групи поврзани со терористички организации.

„Во последно време се забележува раст на антиисламски, ксенофобични и расистички акции во некои европски земји, како и пропагандни демонстрации против нашата земја од страна на групи поврзани со терористичките организации. Ваквиот развој на настаните, што одразува опасни димензии на верска нетолеранција и омраза во Европа, јасно го открива алармантното ниво што го достигнаа расистичките и дискриминаторските движења во Европа“, се вели во соопштението.

„Нашите државјани што живеат во Европа или планираат да патуваат во европските земји, можат во случај на потреба да се обратат до Конзуларниот телефонски центар на нашето Министерство“, објави турското МНР.